ഭുവനേശ്വർ: രാജ്യത്തിന്റെ വികസനത്തിന്റെയും ജനങ്ങളുടെ പ്രതീക്ഷകളുടെയും പ്രതീകമാണ് വന്ദേ ഭാരത് തീവണ്ടികളെന്ന് പ്രധാനമന്ത്രി നരേന്ദ്രമോദി. ഒഡീഷയ്ക്ക് അനുവദിച്ച ആദ്യ വന്ദേഭാരത് എക്സ്പ്രസ് ഫ്ളാഗ് ഓഫ് ചെയ്ത് സംസാരിക്കുകയായിരുന്നു അദ്ദേഹം. നിലവിൽ രാജ്യത്ത് 15 വന്ദേഭാരത് തീവണ്ടികളാണ് ഓടുന്നത്. പശ്ചിമ ബംഗാളിലെ വാണിജ്യ നഗരമായ ഹൗറയേയും ഒഡീഷയിലെ ക്ഷേത്രനഗരമായ പുരിയെയും ബന്ധിപ്പിച്ചാവും വന്ദേഭാരത് തീവണ്ടി ഓടുക.
പുരിക്കും ഹൗറക്കും ഇടയിൽ വരുന്ന 500 കിലോമീറ്റർ ദൂരത്തിലായിരിക്കും വന്ദേഭാരത് സർവ്വീസ് നടത്തുക. ഈ മാസം 20 മുതൽ ആയിരിക്കും വന്ദേഭാരത് സർവ്വീസ് ആരംഭിക്കുക. വ്യാഴാഴ്ച ദിവസങ്ങളിൽ ഒഴികെ ആഴ്ചയിൽ ആറ് ദിവസവും സർവീസ് നടത്തും. രാവിലെ ആറിന് ഹൗറയിൽനിന്ന് പുറപ്പെടുന്ന തീവണ്ടി ഉച്ചയ്ക്ക് 12.30-ഓടെ പുരിയിൽ എത്തിച്ചേരും. തുടർന്ന് ഒരു മണിക്കാണ് മടക്കയാത്ര. 14 ചെയർകാറുകളും രണ്ട് എക്സിക്യൂട്ടീവ് ക്ലാസ് കോച്ചുകളുമടക്കം 16 കോച്ചുകളാവും തീവണ്ടിയിൽ ഉണ്ടാവുക.
പുരിയിലെ ജഗന്നാഥ രഥയാത്ര ജൂൺ 20-ന് തുടങ്ങാനിരിക്കെയാണ് ക്ഷേത്ര നഗരത്തെ ബന്ധിപ്പിച്ച് വന്ദേഭാരത് തീവണ്ടി ഓടിത്തുടങ്ങുന്നത്. ഇത് തീർഥാടകർ അടക്കമുള്ളവർക്ക് തീവണ്ടി സർവീസ് കൂടുതൽ പ്രയോജനപ്പെടുത്താൻ സാധിക്കും. ഹൗറയും പുരിയും തമ്മിലുള്ള സാംസ്കാരികവും ആത്മീയവുമായ ബന്ധം പുതിയ തീവണ്ടി ശക്തിപ്പെടുത്തുമെന്നും പ്രധാനമന്ത്രി പറഞ്ഞു. വീഡിയോ കോൺഫറൻസിലൂടെയാണ് അദ്ദേഹം ഫ്ളാഗ്ഓഫ് ചടങ്ങിൽ പങ്കെടുത്തത്.
