അമൃത്സർ: പഞ്ചാബിലെ അമൃത്സറിൽ ഇന്ത്യൻ അതിർത്തി വഴി മയക്കുമരുന്ന് കടത്താൻ ശ്രമിച്ച ഡ്രോൺ വെടിവെച്ച് വീഴ്ത്തി. ഡ്രോണിലുണ്ടായിരുന്ന് മയക്കുമരുന്ന് അടങ്ങിയ ബാഗ് അതിർത്തി സുരക്ഷാ സേന പിടിച്ചെടുത്തിട്ടുണ്ട്. കഴിഞ്ഞ രണ്ട് ദിവസത്തിനിടെ അതിർത്തിയിൽ വെടിവെച്ചിടുന്ന നാലാമത്തെ ഡ്രോണാണിതെന്ന് ബിഎസ്എഫ് ഉദ്യോഗസ്ഥർ അറിയിച്ചു.
ബിഎസ്എഫ് ഉദ്യോഗസ്ഥർ നാല് പാകിസ്ഥാൻ ഡ്രോണുകൾ തടയുകയും അതിൽ മൂന്നെണ്ണം അതിർത്തിയിൽ വെടിവച്ചിടുകയും ചെയ്തു. രത്തൻ ഖുർദ് ഗ്രാമത്തിൽ നിന്ന് ആദ്യം വെടിവെച്ച് വീഴ്ത്തിയ ഡ്രോണിൽ 2.6 കിലോ ഹെറോയിൻ അടങ്ങിയ രണ്ട് പാക്കറ്റുകളും സേന പിടിച്ചെടുത്തിട്ടുണ്ട്. നിരന്തരമായുള്ള മയക്കുമരുന്ന് കടത്ത് കണ്ടെത്തുന്നതിനും നടപടിയെടുക്കുന്നതിനും അതിർത്തി പ്രദേശങ്ങളിൽ കർശന സുരക്ഷയാണ് ഒരുക്കിയിട്ടുള്ളതെന്ന് ഉദ്യോഗസ്ഥർ അറിയിച്ചു.
