ന്യൂഡൽഹി: മുന്ന് ദിവസത്തെ ഔദ്യോഗിക ഇന്ത്യൻ സന്ദർശനത്തിനായി എത്തിയ നേപ്പാൾ പ്രധാനമന്ത്രി പുഷ്പ കമാൽ ദഹലും ഇന്ത്യൻ പ്രധാനമന്ത്രി നരേന്ദ്ര മോദിയും തമ്മിൽ ഉഭയകക്ഷി ചർച്ച നടന്നു. ഹൈദരാബാദ് ഹൗസിലാണ് ഇരുവരുടെയും കൂടിക്കാഴ്ച നടത്തിയത്. കൂടിക്കാഴ്ചയിൽ ഇന്ത്യയും നേപ്പാളും തമ്മിലുള്ള ഉഭയകക്ഷി കരാറുകളിലെ പുരോഗതി സംബന്ധിച്ച് വിശദമായ ചർച്ച നടന്നു. നേപ്പാൾ പ്രധാനമന്ത്രി ഉജ്ജയിൻ, ഇൻഡോർ എന്നീ സ്ഥലങ്ങളും സന്ദർശിക്കും.
ഇന്ത്യയിലെത്തിയ പുഷ്പകമാൽ ദഹൽ രാജ്ഘട്ടിലെ മഹാത്മാഗാന്ധി സമാധിയിൽ പുഷ്പചക്രം അർപ്പിച്ചു. കഴിഞ്ഞ വർഷമാണ് പുഷ്പകമാൽ ദഹൽ നേപ്പാൾ പ്രധാനമന്ത്രിയായി അധികാരമേറ്റത്. എയർപോർട്ടിലെത്തിയ അദ്ദേഹത്തെ കേന്ദ്രമന്ത്രി മീനാകാക്ഷി ലേഖിയാണ് സ്വീകരിച്ചത്. പുഷ്പകമാൽ ദഹൽ ഇന്നലെ ദേശീയ സുരക്ഷാ ഉപദേഷ്ടാവ് അജിത് ഡോവലുമായി കൂടിക്കാഴ്ച നടത്തിയിരുന്നു. പ്രസിഡന്റ് ദ്രൗപതി മുർമു, വൈസ് പ്രസിഡന്റ് ജഗ്ദീപ് ധൻഖർ എന്നിവരുമായും അദ്ദേഹം കൂടിക്കാഴ്ച നടത്തും. ഇന്ത്യയിലെ നേപ്പാൾ അംബാസഡർ ശങ്കർ. പി ശർമ്മ നേപ്പാൾ പ്രധാനമന്ത്രിയുടെ സന്ദർശനത്തെ ഗുഡ് വിൽ വിസിറ്റ് എന്നാണ് വിളിച്ചത്. ഔദ്യോഗിക സന്ദർശനം കഴിഞ്ഞ് അദ്ദേഹം മൂന്നിന് മടങ്ങും.
Comments