ഐഐടി മദ്രാസിന്റെ അന്താരാഷ്ട്ര ക്യാമ്പസ് ഉടൻ യാഥാർത്ഥ്യമാകും. 2023-ൽ ഒക്ടോബറിൽ ടാൻസാനിയയിലാകും ക്യാമ്പസ് തുറക്കുക. ഐഐടി മദ്രാസ് അറ്റ് സാൻസിബാർ എന്ന പേരിലാകും ക്യാമ്പസ് സ്ഥാപിക്കുകയെന്ന് ടാൻസാനിയൻ ദിനപത്രമായ ദി സിറ്റിസൺ വ്യക്തമാക്കുന്നു.
50 ബിരുദ സീറ്റുകളും 20 ബിരുദാനന്തര സീറ്റുകളുമുള്ള ബാച്ചാകും ആദ്യ ഘട്ടത്തിലുണ്ടാവുക. ഡാറ്റാ സയൻസ്, ആർട്ടിഫിഷ്യൽ ഇന്റലിജൻസ് കോഴ്സുകൾ ആദ്യ വർഷങ്ങളിലുണ്ടാകും. കോഴ്സിന്റെ ഫീസ് ഘടന ഇതുവരെ പുറത്തുവിട്ടില്ല.
സാൻസിബാറിലെ ഐഐടിയിൽ എൻറോൾ ചെയ്യുന്ന വിദ്യാർത്ഥികൾക്ക് ഇന്ത്യയിലെ ഐഐടി വിദ്യാർത്ഥികളുടെ അതേ പദവിയും ആനുകൂല്യങ്ങളും ലഭ്യമാകുമെന്ന് അധികൃതർ വ്യക്തമാക്കി. മൂന്ന് ഘട്ടമായാകും സാൻസിബാർ ഐഐടിയിലെ പ്രവേശന പ്രക്രിയ. പ്രവേശന പരീക്ഷ, തയ്യാറെടുപ്പ് പ്രോഗ്രാം, വ്യക്തിഗത അഭിമുഖം എന്നിവ പാസാകുന്നവർക്ക് സാൻസിബാർ ഐഐടിയിൽ സീറ്റുറപ്പിക്കാം.
ഇന്ത്യൻ ഇൻസ്റ്റിറ്റ്യൂട്ട് ഓഫ് ടെക്നോളജിയുടെ മൂന്ന് ക്യാമ്പസുകളാണ് വിദേശത്ത് സ്ഥാപിക്കാൻ പദ്ധതിയിടുന്നത്. സാൻബാർ, അബുദാബി, ക്വാലാലംപൂർ എന്നിവിടങ്ങളിലാണ് ഐഐടി ക്യാമ്പസ് ആരംഭിക്കുക. കിഴക്കൻ ആഫ്രിക്കൻ മേഖലയിലാകും ടാൻസാനിയയിലെ സാൻസിബാറലിലെ ക്യാമ്പസ് പ്രവർത്തിക്കുക. ആഫ്രിക്കൻ ജനതയുടെ ഉന്നമനത്തിനുള്ള പ്രധാന കേന്ദ്രമാകും സാൻസിബാറിലെ ഐഐടി.
