അമേരിക്കയിൽ നടന്ന സ്പെല്ലിംഗ് ബീ മത്സരത്തിൽ ജേതാവായി ഇന്ത്യൻ വംശജനായ 14-കാരൻ. ദേവ് ഷാ എന്ന വിദ്യാർത്ഥി 11 അക്ഷരമുള്ള വാക്കിന്റെ സ്പെല്ലിംഗ് കൃത്യമായി പറഞ്ഞതോടെയായിരുന്നു 2023 സ്ക്രിപ്സ് നാഷണൽ സ്പെല്ലിംഗ് ബീയുടെ ജേതാവായി മാറിയത്. 50,000 ഡോളർ തുക കാഷ് പ്രൈസായും ദേവ് ഷാ നേടി. ഫൈനലിൽ ദേവ് ഷാ നേരിടേണ്ടി വന്നത് ‘psammophile’ എന്ന വാക്കായിരുന്നു.
അമേരിക്കൻ സംസ്ഥാനമായ മാരിലാൻഡിൽ വച്ചായിരുന്നു മത്സരം നടന്നത്. 2019ലും 2021ലും നടന്ന സ്പെല്ലിംഗ് ബീ മത്സരത്തിൽ ദേവ് പങ്കെടുത്തിരുന്നു. കഴിഞ്ഞ 24 വർഷത്തിനിടെ സ്പെല്ലിംഗ് ബീ മത്സരത്തിൽ ഒന്നാമതെത്തുന്ന ദക്ഷിണേഷ്യൻ പാരമ്പര്യമുള്ള 22-ാമത്തെ ചാമ്പ്യൻ കൂടിയാണ് ദേവ് ഷാ. അവിശ്വസനീയമാണ് ഈ നേട്ടമെന്നും ഇപ്പോഴും എന്റെ കാലുകൾ വിറയ്ക്കുകയാണെന്നുമായിരുന്നു ചാമ്പ്യനായതിന് പിന്നാലെ ദേവ് ഷായുടെ പ്രതികരണം. ഫ്ളോറിഡയിലാണ് 14-കാരനും കുടുംബവും താമസിക്കുന്നത്.
2023ലെ സ്പെല്ലിംഗ് ബീ മത്സരത്തിൽ ഒന്നാം സ്ഥാനം ഇന്ത്യൻ വംശജൻ നേടിയെടുത്തപ്പോൾ വിർജീനിയ സ്വദേശിയായ 14-കാരി ഷാർലെറ്റ് വാഷ് ആണ് രണ്ടാമതെത്തിയത്. 11 ദശലക്ഷം പേർ ലോകത്തിന്റെ വിവിധ ഭാഗങ്ങളിൽ നിന്ന് പങ്കെടുത്ത മത്സരത്തിൽ 11 പേരെയായിരുന്നു ഫൈനലിസ്റ്റായി തിരഞ്ഞെടുത്തത്. പ്രിലിമിനറി റൗണ്ടുകൾ ചൊവ്വാഴ്ച ആരംഭിച്ചു. പിന്നീട് ക്വാർട്ടർ ഫൈനൽ മത്സരങ്ങളും സെമി ഫൈനൽ മത്സരങ്ങളും ബുധനാഴ്ച നടന്നു.
നാഷണൽ സ്പെല്ലിംഗ് ബീ മത്സരത്തിൽ കഴിഞ്ഞ ഏതാനും വർഷങ്ങളായി ഇന്ത്യൻ – അമേരിക്കൻ വിദ്യാർത്ഥികളാണ് ആധിപത്യം സൃഷ്ടിക്കുന്നത്. കഴിഞ്ഞ തവണ ഹരിണി ലോഗൻ എന്ന ടെക്സാസ് സ്വദേശിയായ വിദ്യാർത്ഥിനി മറ്റൊരു ഇന്ത്യൻ – അമേരിക്കനായ വിക്രം രാജുവിനെയാണ് ഫൈനലിൽ തോൽപ്പിച്ച് ഒന്നാമതെത്തിയത്.
Comments