സാരിയുടുത്താൽ പിന്നെ നടക്കാനും ഇരിക്കാനും ഒക്കെ പ്രയാസമാണെന്ന് പറയുന്ന ധാരാളം സ്ത്രീകളുണ്ട്. ഇക്കാരണത്താൽ സാരി ധരിക്കാൻ മടിക്കുന്നവരും കുറവല്ല. എന്നാൽ സാരിയുടുത്ത് നടക്കാനും ഇരിക്കാനും മാത്രമല്ല, സിംപിളായി ബ്രേക്ക് ഡാൻസ് കളിക്കാനും സാധിക്കുമെന്ന് തെളിയിച്ചിരിക്കുകയാണ് ഒരു യുവതി. ഇൻസ്റ്റഗ്രാമിൽ തരംഗമായ വീഡിയോയിലാണ് സാരിയണിഞ്ഞ യുവതിയുടെ അവിസ്മരണീയ പ്രകടനമുള്ളത്.
ജീൻസും ടോപ്പും ധരിച്ചാലേ ബ്രേക്ക് ഡാൻസ് കളിക്കാൻ സാധിക്കൂവെന്ന ചിന്താഗതിയെയും തച്ചുടച്ചിരിക്കുകയാണ് ഈ വൈറൽ താരം. വൺ ലെയറിൽ സാരിയുടുത്ത് ഷോർട്ട്-സ്ലീവ് ബ്ലൗസണിഞ്ഞ് വലിയ ഹീൽസ് ചെരുപ്പ് ധരിച്ച് എത്ത്നിക്ക് ലുക്കിലായിരുന്നു പെൺകുട്ടി ചടങ്ങിനെത്തിയത്. ഹാളിൽ പാട്ടുവച്ചതോടെ താളത്തിന് അനുസരിച്ച് യുവതി നൃത്തം ചെയ്യാൻ തുടങ്ങി. തീർത്തും അനായാസമായ രീതിയിലായിരുന്നു അവർ കടുപ്പമേറിയ നൃത്തച്ചുവടുകൾ കാഴ്ചവച്ചത്. യുവതിയുടെ പ്രകടനത്തെ അത്ഭുതത്തോടെ ആളുകൾ നോക്കി നിൽക്കുന്നതും വീഡിയോയിൽ കാണാം.
ഡാൻസ് വീഡിയോ വൈറലായതോടെ നിരവധി പേർ യുവതിയെ അഭിനന്ദിച്ച് രംഗത്തെത്തിയിരുന്നു. സാരിയുടുത്ത് നേരാംവണ്ണം നടക്കാൻ പോലും അറിയാതെ സ്ത്രീകൾ പാടുപെടുമ്പോഴാണ് സാരിയും ഹീൽസുമണിഞ്ഞെത്തിയ പെൺകുട്ടി ബ്രേക്ക് ഡാൻസ് കളിക്കുന്നതെന്നായിരുന്നു പലരുടെയും പ്രതികരണം.
Comments