ബെംഗളുരു: റെയിൽവേ മന്ത്രി അശ്വനി വൈഷ്ണവിന് പിന്തുണയുമായി മുൻ പ്രധാനമന്ത്രിയും ജെഡിഎസ് നേതാവുമായ എച്ച്ഡി ദേവഗൗഡ. ബാലസോർ ട്രെയിൻ അപകടവുമായി ബന്ധപ്പെട്ട് റെയിൽവേ മന്ത്രി രാജിവെക്കണമെന്ന പ്രതിപക്ഷ ആവശ്യം അദ്ദേഹം തള്ളി. ബാലസോറിൽ സ്ഥിതി പഴയരീതിയിലാക്കാൻ അശ്വനി വൈഷ്ണവ് അക്ഷീണം പ്രവർത്തിക്കുന്നുണ്ടെന്നും ഈ അവസരത്തിൽ അദ്ദേഹത്തിന്റെ രാജി ആവശ്യപ്പെടുന്നത് ശരിയല്ലെന്നും ദേവഗൗഡ പറഞ്ഞു.
റെയിൽവേ മന്ത്രി ഉചിതമായ നടപടികളാണ് സ്വീകരിച്ചിരിക്കുന്നത്. നിലവിൽ സംഭവിച്ചിരിക്കുന്ന തകരാർ പരിഹരിക്കാൻ അദ്ദേഹം ഫലപ്രദമായി പ്രവർത്തിക്കുന്നുണ്ട്. വിഷയത്തിൽ അന്വേഷണം നടക്കുകയാണ്. ഈ അവസരത്തിൽ മന്ത്രിയുടെ രാജി ആവശ്യപ്പെടുന്നത് ഉചിതമല്ല. ദേവഗൗഡ പറഞ്ഞു.
പ്രതിപക്ഷ നിരയിലെ ഏറ്റവും തലമുതിർന്ന നേതാവാണ് ജെഡിഎസ് അദ്ധ്യക്ഷൻ കൂടിയായ ദേവഗൗഡ. വിഷയത്തിൽ മന്ത്രിയുടെ രാജി ആവശ്യപ്പെട്ടുള്ള നീക്കം ശരിയല്ല എന്ന ദേവഗൗഡയുടെ പരാമർശം ട്രെയിൻ ദുരന്തത്തെ രാഷ്ട്രീയ വിഷയമാക്കി അവതരിപ്പിക്കാനുള്ള പ്രതിപക്ഷനീക്കത്തിന് തിരിച്ചടി നൽകിയിരിക്കുകയാണ്.
ബാലസോർ ട്രെയിൻ ദുരന്തം സിബിഐ തന്നെ അന്വേഷിക്കുമെന്ന് കേന്ദ്ര റെയിൽവേ മന്ത്രി അശ്വനി വൈഷ്ണവ് കഴിഞ്ഞ ദിവസം വ്യക്തമാക്കിയിരുന്നു. ഇത് സംബന്ധിച്ച് റെയിൽവേ ബോർഡിന്റെ ശുപാർശ ലഭിച്ചതായും അദ്ദേഹം വ്യക്തമാക്കി.
Comments