ലിജോ ജോസ് പെല്ലിശേരിയുടെ സംവിധാനത്തിൽ ഒരുങ്ങുന്ന മലൈക്കോട്ടൈ വാലിബന്റെ ചിത്രീകരണം പൂർത്തിയാക്കിയതിന് ശേഷം മോഹൻലാൽ തെലുങ്ക് ചിത്രമായ ഋഷഭയിലേക്ക്. പാൻ ഇന്ത്യൻ ചിത്രമായി നന്ദ കിഷോർ ഒരുക്കുന്ന ചിത്രമാണ് ഋഷഭ. ചിത്രത്തിന്റെ ചിത്രീകരണം ജൂലൈയിൽ ആരംഭിക്കും. നിലവിൽ മലൈക്കോട്ടെ വാലിബന്റെ ചിത്രീകരണം പോണ്ടിച്ചേരിയിലാണ് നടന്നു വരുന്നത്. നാളെ ചെന്നൈയിലേക്ക് ഷിഫ്ട് ചെയ്യും. ജൂൺ പത്തിന് ചിത്രീകരണം പൂർത്തിയാക്കി പാക്കപ്പ് ആകും. ഇതിന് ശേഷമായിരിക്കും ഋഷഭയുടെ ചിത്രീകരണം ആരംഭിക്കുക.
അച്ഛനും മകനും തമ്മിലുള്ള സ്നേഹ ബന്ധത്തിന്റെയും പ്രതികാരത്തിന്റെയും കഥ പറയുന്ന ചിത്രമാണ് ഋഷഭ. ചിത്രം തെലുങ്കിന് പുറമേ മലയാളം, ഹിന്ദി, തമിഴ് ഭാഷകളിൽ മൊഴിമാറ്റത്തിലൂടെയും പ്രേക്ഷകർക്ക് മുന്നിലെത്തും. മോഹൻലാൽ അച്ഛൻ വേഷത്തിലെത്തുമ്പോൾ തെലുങ്കിലെ ഒരു പ്രമുഖ യുവനടനാണ് മകനായി എത്തുകയെന്ന വാർത്ത മുൻപ് പുറത്തു വന്നിരുന്നു. വിജയ് ദേവരകൊണ്ട മോഹൻലാലിന്റെ മകന്റെ വേഷത്തിലെത്തുമെന്നാണ് റിപ്പോർട്ട്.
എവിഎസ് സ്റ്റുഡിയോസിന്റെ ബാനറിൽ അഭിഷേക് വ്യാസ്, പ്രവീർ സിംഗ്, ശ്യാംസുന്ദർ എന്നിവർ ചേർന്നാണ് ചിത്രം നിർമ്മിക്കുന്നത്. കന്നഡ സംവിധായകൻ നന്ദ കിഷോറാണ് ചിത്രത്തിന്റെ സംവിധാനം നിർവഹിക്കുന്നത്. ആക്ഷനും ഇമോഷനും കലർന്ന ഒരു ബിഗ്ബജറ്റ് എന്റർടെയ്നറായിരിക്കും ഋഷഭ. ജനതാ ഗ്യാരേജിന് ശേഷം മോഹൻലാൽ അഭിനയിക്കുന്ന തെലുങ്ക് ചിത്രമാണിത്.
അതേസമയം മോഹൻലാൽ-ജീത്തു ജോസഫ് കൂട്ടുകെട്ടിൽ ഒരുങ്ങുന്ന ചിത്രമായ റാമിന്റെ അറുപത് ദിവസത്തെ ചിത്രീകരണം പൂർത്തിയാക്കാനുണ്ട്. ഋഷഭയുടെ ചിത്രീകരണത്തിന് ശേഷം റാമിലേക്കാണോ മോഹൻലാലിന്റെ പ്രവേശനം എന്നത് സംബന്ധിച്ച് തീരുമാനമായിട്ടില്ല.
