ദിവസവും രാവിലെ വെറും വയറ്റിൽ ഒരു ഗ്ലാസ് ഉലുവവെള്ളം ശീലമാക്കുന്നത് വളരെ നല്ലതാണ്. വയറിന് സംഭവിക്കുന്ന പല ആരോഗ്യ പ്രശ്നങ്ങൾക്കും ഉലുവ വെള്ളം കുടിക്കുന്നത് നല്ലതാണ്. ഉലുവയിൽ ധാരാളം നാരുകൾ അടങ്ങിയിരിക്കുന്നതിനാൽ ദഹനം നടക്കാൻ ഇത് സഹായിക്കും. കൂടാതെ നെഞ്ചെരിച്ചിൽ പോലുള്ള പ്രശ്നങ്ങളും ഇതിലൂടെ ഒരു പരിധിവരെ കുറയ്ക്കാൻ കഴിയും. ഭക്ഷ്യ വിഷബാധ പോലുള്ള പ്രശനങ്ങളെ ചെറിയ തോതിൽ ചെറുക്കാനും ഉലുവയ്ക്ക് കഴിയും.
ഉലുവ വെള്ളം രണ്ട് രീതിയിൽ ഉപയോഗിക്കാം. തലേ ദിവസം രാത്രി പച്ചവെള്ളത്തിൽ കുതിർത്ത് വെച്ച് ചൂടാക്കാതെ കുടിക്കാം. അല്ലെങ്കിൽ തിളപ്പിച്ച ശേഷം ചൂടാറ്റിയും കുടിക്കാം. ഉലുവയ്ക്ക് കയ്പ്പ് ചുവയുള്ളതിനാൽ ചൂടാക്കി കുടിക്കുമ്പോൾ തേൻ ചേർത്താൽ ബുദ്ധിമുട്ടില്ലാതെ കുടിക്കാം. ഉലുവ വെള്ളം കുടിക്കുന്നത് കൊണ്ടുള്ള ഏറ്റവും പ്രധാനപ്പെട്ട ഗുണം ഇത് ദഹനം മെച്ചപ്പെടുത്തും എന്നുള്ളതാണ്. ദഹനത്തിനു സഹായിക്കുന്ന അന്റാസിഡുകളുടെ ഉറവിടമാണ് ഉലുവ. അതുകൊണ്ടു തന്നെ ഉലുവ കുതിർത്ത വെള്ളം ഇളംചൂടോടു കൂടി കുടിക്കുന്നത് ദഹനപ്രശ്നങ്ങളായ അസിഡിറ്റി, വയറിനു കനം ഇവയെല്ലാം അകറ്റും.
വെറുംവയറ്റിൽ ദിവസവും ഉലുവ വെള്ളം കുടിക്കുന്നത് ശീലമാക്കാവുന്നതാണ്. ഇത് ശരീരത്തിലെ അനാവശ്യ കൊഴുപ്പ് കുറയ്ക്കുന്നതിനും തുടർന്ന് ഭാരം കുറയ്ക്കുന്നതിനും സഹായകമാണ്. ഉലുവയിൽ അടങ്ങിയിട്ടുള്ള നാരുകൾ വയറിലും അഡിപ്പോസ് ടിഷ്യൂകളിലും വേഗത്തിൽ കൊഴുപ്പ് കുറയ്ക്കുന്നതിന് സഹായിക്കുന്നു. ഉലുവ ശരീരത്തിലെ ചീത്ത കൊളസ്ട്രോൾ ആയ എൽഡിഎൽ കുറയ്ക്കാൻ സഹായിക്കുന്നു. അതുകൊണ്ടുതന്നെ കൊളസ്ട്രോൾ കൂടുതൽ ഉള്ളവർ ദിവസവും വെറുംവയറ്റിൽ ഉലുവ വെള്ളം കുടിക്കുന്നത് നല്ലതാണ്.
ചർമത്തിന്റെയും തലമുടിയുടെയും ആരോഗ്യത്തിന് ഉലുവ വെള്ളം ഗുണം ചെയ്യും. ആന്റിബാക്ടീരിയൽ, ആന്റി ഇൻഫ്ലമേറ്ററി ഗുണങ്ങൾ ഉള്ള ഡയോസ്ജെനിൻ എന്ന ഒരു സംയുക്തം ഉലുവയിലുണ്ട്. ഇതാണ് മുടി വളർച്ചയ്ക്കും ചർമത്തിന്റെ ആരോഗ്യത്തിനും സഹായിക്കുന്നത്. ഉലുവ വെള്ളം വെറുവയറ്റിൽ കുടിക്കുന്നത് ആരോഗ്യവും തിളക്കവുമുള്ള ചർമം ലഭിക്കാൻ സഹായിക്കും. പ്രമേഹമുള്ളവർ ദിവസവും ഒരു ഗ്ലാസ് ഉലുവ വെള്ളം കുടിക്കുന്നത് ശീലമാക്കുന്നത് നല്ലതാണ്.കാരണം, രക്തത്തിലെ പഞ്ചസാരയുടെ അളവ് നിയന്ത്രിക്കാൻ ഉലുവ സഹായകമാണ്.
Comments