ഇടുക്കി: കമ്പം ജനവാസമേഖലയിൽ ഭീകരാന്തരീക്ഷം സൃഷ്ടിച്ചതിനെ തുടർന്നാണ് തിമിഴ്‌നാട് വനം വകുപ്പ് അരിക്കൊമ്പനെ പിടികൂടി മുത്തുകുളി വനത്തിൽ തുറന്നുവിട്ടത്. ഇപ്പോഴിതാ ഇതിൽ പ്രതിഷേധവുമായി എത്തിയിരിക്കുകയാണ് പേച്ചിപ്പാറയിലെ വനവാസി സമൂഹം. അരിക്കൊമ്പനെ കേരളത്തിലേയ്‌ക്ക് തന്നെ തിരികെ കൊണ്ടുപോകണമെന്നാണ് പ്രദേശവാസികളുടെ ആവശ്യം. മയക്കുവെടിവെച്ച് പിടികൂടിയ അരിക്കൊമ്പനെ അപ്പർ കോതയാർ മുത്തുകുളി വനമേഖലയിലാണ് തുറന്നു വിട്ടത്. നിലവിൽ അരിക്കൊമ്പൻ കോതയാർ ഡാമിന്റെ വൃഷ്ടിപ്രദേശത്താണുള്ളത്.
തിങ്കളാഴ്ച രാവിലെയായിരുന്നു അരിക്കൊമ്പനെ തേനിയിൽ നിന്ന് പിടികൂടിയത്. ശേഷം തിരുനെൽവേലി ജില്ലയിലെ മണിമുത്താർ വനത്തിലേക്ക് ട്രക്കിൽ എത്തിക്കുകയും അവിടെ നിന്ന് 75 കിലോമീറ്റർ അകലെയുള്ള അപ്പർ കോതയാർ മുത്തുകുളി വനത്തിൽ തുറന്നുവിടുകയുമായിരുന്നു. തുടർന്നാണ് പേച്ചിപ്പാറയ്‌ക്ക് സമീപത്ത് താമസിക്കുന്ന വനവാസികൾ പ്രതിഷേധവുമായി രംഗത്തെത്തിയത്. ആനയെ ഈ പ്രദേശത്ത് തുറന്നു വിട്ടാൽ കൃഷി ഭൂമിയും ജനവാസമേഖലയും നശിപ്പിക്കുമെന്നും അതിനാൽ ആനയെ ഇവിടെ നിന്നും മാറ്റണമെന്നുമാണ് പ്രദേശവാസികളുടെ ആവശ്യം. ആനയെ കേരളത്തിലേയ്‌ക്ക് തന്നെ തിരികെ കൊണ്ടു പോകണമെന്നുമാണ് പ്രദേശവാസികളുടെ ആവശ്യം
അതേസമയം അരിക്കൊമ്പനെ തിരികെ ചിന്നക്കനാലിൽ എത്തിക്കണം എന്നാവശ്യവുമായി ഇടുക്കി ചിന്നകനാലിൽ ഗോത്ര ജനതയുടെ നേതൃത്വത്തിൽ സൂചനാ സമരം നടന്നിരുന്നു. സൂചന സമരത്തിൽ വനവാസി വിഭാഗമായ മുതുവാൻ സമുദായത്തിലെ അഞ്ച് കുടികളിലെ ജനങ്ങളാണ് സമരവുമായി രംഗത്തെത്തിയത്. അരിക്കൊമ്പന്റെ ആരോഗ്യത്തിന് ഹാനികരമാകുന്ന രീതിയിൽ വീണ്ടും നടപടികളുണ്ടായാൽ സമരം ശക്തമാക്കുമെന്നും ഇവർ പറയുന്നു. തുടർച്ചയായ മയക്കു വെടികളും കാട് മാറ്റവും ആനയുടെ ആരോഗ്യ സ്ഥിതിയെ കാര്യമായി ബാധിച്ചെന്നാണ് ഇവരുടെ ആരോപണം. ആന ജനിച്ചു വളർന്ന മതികെട്ടാൻ വനമേഖലയിലേക്ക് തന്നെ തിരികെ എത്തിയ്‌ക്കുകയും കൃത്യമായ ചികിത്സ ലഭ്യമാക്കണമെന്നുമാണ് ചിന്നക്കനാലുകാരുടെ ആവശ്യം.
Comments