ദി കേരള സ്റ്റോറിയുടെ വൻ വിജയത്തിന് ശേഷം ബയോപിക്കുമായി സംവിധായകൻ സുദീപ്തോ സെൻ. സഹാറ ഇന്ത്യ പരിവാർ സ്ഥാപകനും വ്യവസായിയുമായ സുബ്രതാ റോയിയുടെ ജീവിതം ആസ്പദമാക്കിയ സഹാറശ്രീ എന്ന് പേരിട്ടിരിക്കുന്ന ചിത്രത്തിന്റെ പണിപ്പുരയിലാണ് സുദിപ്തോ സെൻ.
സുബ്രതാ റോയിയുടെ 75-ാം ജന്മദിനത്തിലാണ് ചിത്രം സംബന്ധിച്ച പ്രഖ്യാപനം ഉണ്ടായത്. സന്ദീപ് സിംഗ്, ഡോ ജയന്തിലാൽ ഗഡ എന്നിവർ ചേർന്നാണ് ചിത്രം നിർമ്മിക്കുന്നത്. ഇന്ത്യയിലെ എറ്റവും പ്രബല ബിസിനസ് ഗ്രൂപ്പിന്റെ തലവനായ സുബ്രതാ റോയിയുടെ ജീവിതം പൊതുജനങ്ങൾക്ക് അധികം പരിചിതമല്ല. മുഴുവൻ ഇന്ത്യക്കാർക്കും അദ്ദേഹത്തിന്റെ സംഭവബഹുലമായ ജീവിതം പരിചയപ്പെടുത്തുകയാണ് അണിയറ പ്രവർത്തകരുടെ ലക്ഷ്യം.
ഒരു ബയോപിക് ചിത്രീകരിക്കുക എന്നത് ഒരു സംവിധായകനെ സംബന്ധിച്ച് വെല്ലുവിളിയാണെന്ന് സുദിപ്തോ സെൻ പറഞ്ഞു. എ ആർ റഹ്മാൻ, ഗുൽസാർ, സന്ദീപ് സിംഗ്, ഡോ. ജയന്തിലാൽ ഗദ എന്നിവർ ഒരു സിനിമയ്ക്കായി ഒന്നിക്കുന്നതിൽ അഭിമാനം തോന്നുന്നെന്ന് അദ്ദേഹം കൂട്ടിച്ചേർത്തു.
എന്നാൽ സുബ്രത റോയിയുടെ വേഷം ആരായിരിക്കുമെന്ന് അണിയറ പ്രവർകർ ഇതുവരെ വെളിപ്പെടുത്തിയിട്ടില്ല. സൂപ്പർ താരങ്ങളുടെ പേരും പരിഗണിക്കുന്നുണ്ടെന്നാണ് ലഭിക്കുന്ന് വിവരം. ഗുൽസാർ, എ ആർ റഹ്മാൻ എന്നിവർ ചേർന്നാണ് ചിത്രത്തിലെ ഗാനങ്ങൾ ഒരുക്കുക.മഹാരാഷ്ട്ര, ഉത്തർപ്രദേശ്, ഡൽഹി, ബിഹാർ, കൊൽക്കത്ത, ലണ്ടൻ എന്നിവിടങ്ങളിലായിരിക്കും ചിത്രീകരണം. അടുത്ത വർഷം ആദ്യം ചിത്രം തിയറ്ററുകളിലെത്തും.
Comments