ഇസ്ലാമാബാദ്: പാകിസ്താനിൽ പ്രായപൂർത്തിയാകാത്ത ഹിന്ദു പെൺകുട്ടിയെ തട്ടിക്കൊണ്ടുപോയി മതംമാറ്റി വിവാഹം കഴിപ്പിച്ച സംഭവത്തിൽ കോടതിയുടെ ഉത്തരവ് വിവാദമാകുന്നു. പെൺകുട്ടിയുടെ വീട്ടുകാരോടൊപ്പം കുട്ടിയെ അയക്കുന്നതിന് കോടതി വിസ്സമതിച്ചതാണ് വിമർശനങ്ങൾക്ക് കാരണം.
സോഹാന ശർമ്മ എന്ന പെൺകുട്ടിയെ തട്ടിക്കൊണ്ടുപോയി നിർബന്ധിത മതപരിവർത്തനത്തിന് വിധേയമാക്കിയാണ് മുസ്ലീം യുവാവിനെക്കൊണ്ട് വിവാഹം കഴിപ്പിച്ചത്. തുടർന്ന് മാതാപിതാക്കളുടെ പരാതിയെ തുടർന്ന് അവളെ ലാർകാനയിലുള്ള ജില്ലാ കോടതിയിൽ ഹാജരാക്കി. വീട്ടുകാരുടെ അടുത്തേക്ക് പോകാനാണ് ആഗ്രഹിക്കുന്നതെന്ന് പെൺകുട്ടി കോടതിയെ അറിയിച്ചെങ്കിലും ഇതിന് വിസ്സമതിക്കുകയായിരുന്നു കോടതി. പെൺകുട്ടിയെ വനിതാ അഭിയ കേന്ദ്രത്തിലേക്ക് അയക്കാനാണ് കോടതി ഉത്തരവിട്ടത്.
സിന്ധ് പ്രവിശ്യയിലെ ബേനസിറാബാദ് ജില്ലയിലായിരുന്നു സോഹാന ശർമ്മ കുമാരിയെന്ന 14 വയസുള്ള പെൺകുട്ടിയും കുടുംബവും താമസിച്ചിരുന്നത്. 2023 ജൂൺ രണ്ടിന് സോഹാനയെ അവളുടെ അദ്ധ്യാപകനും സഹായികളും ചേർന്ന് അമ്മയുടെ കൺമുന്നിൽ വച്ച് തട്ടിക്കൊണ്ടുപോകുകയായിരുന്നു. അമ്മയെ തോക്കുചൂണ്ടി ഭീഷണിപ്പെടുത്തിയാണ് സംഘം തട്ടിക്കൊണ്ടുപോയത്. ഇതിന് പിന്നാലെ സോഹാനയുടെ പിതാവ് ദിലീപ് കുമാർ പോലീസിൽ പരാതി നൽകി. വിവാഹിതയായെന്നും നിർബന്ധിച്ച് മതംമാറ്റിയെന്നും പറയുന്ന സോഹാനയുടെ വീഡിയോ ഇതിനിടെ വീട്ടുകാർക്ക് ലഭിച്ചു. ഇതോടെ പെൺകുട്ടിയെ തട്ടിക്കൊണ്ടുപോയ സംഭവം സോഷ്യൽമീഡിയയിൽ ചർച്ചയാകുകയും പോലീസ് നടപടിയുടെ ഭാഗമായി അഞ്ച് ദിവസത്തിനുള്ളിൽ സോഹാനയെ കോടതിയിൽ ഹാജരാക്കുകയുമായിരുന്നു.
നിർബന്ധിച്ചാണ് ഇസ്ലാമിലേക്ക് മതംമാറ്റിയതെന്നും മുസ്ലീം യുവാവിനെ വിവാഹം കഴിച്ചതെന്നും കോടതിയിൽ വ്യക്തമാക്കിയ പെൺകുട്ടി തന്റെ മാതാപിതാക്കളോടൊപ്പം പോകണമെന്ന് ആവശ്യപ്പെടുകയും ചെയ്തു. എന്നാൽ കേസ് ജൂൺ 12ന് പരിഗണിക്കാമെന്ന് അറിയിച്ച കോടതി പെൺകുട്ടിയെ വനിതാ അഭയ കേന്ദ്രത്തിലേക്ക് അയക്കാൻ ഉത്തരവിട്ടു. സമാനമായ കേസുകളിൽ മുമ്പും പെൺകുട്ടികളെ രക്ഷിതാക്കളോടൊപ്പം വിടാൻ കോടതി വിസമ്മതിച്ചിട്ടുണ്ടെന്നാണ് റിപ്പോർട്ട്.
ഇതിനിടെ വീട്ടിലേക്ക് കൊണ്ടുപോകണമെന്ന് ആവശ്യപ്പെട്ട് പിതാവ് ദിലീപ് കുമാറിന്റെ കൈ പിടിച്ച് സോഹാന കരയുന്ന വീഡിയോയും വൈറലായിരുന്നു.
സോഹാന നേരിട്ട അതിക്രമത്തെക്കുറിച്ച് പാകിസ്താനിലെ പീപ്പിൾസ് പാർട്ടി പ്രതിനിധിയായ ലാൽ ചന്ദ് ഉക്രാനി സിന്ധ് നിയമസഭയിൽ കഴിഞ്ഞ ദിവസം ഉന്നയിച്ചിരുന്നു. നിർബന്ധിത മതപരിവർത്തനത്തിനും നിർബന്ധിച്ച് വിവാഹം കഴിപ്പിക്കുന്നതിനും ഒരു മതത്തിനും അധികാരമില്ല. ഇത് ക്രൂരമായ പ്രവൃത്തിയാണ്. എല്ലാ മതത്തെയും ബഹുമാനിക്കുന്നു. പക്ഷെ, നിർബന്ധിച്ച് ഒരാളുടെ മതത്തെ മാറ്റുന്നത് ശരിയായ നടപടിയല്ലെന്നും അദ്ദേഹം നിയമസഭയിൽ ചൂണ്ടിക്കാട്ടി.
2022ലെ കണക്ക് പ്രകാരം ഇതരമതങ്ങളിലെ 124 പെൺകുട്ടികളെയാണ് നിർബന്ധിത മതപരിവർത്തനത്തിന് വിധേയമാക്കിയത്. ഇതിൽ 81 പെൺകുട്ടികൾ ഹിന്ദുക്കളും 42 പേർ ക്രിസ്ത്യാനികളും ഒരു പെൺകുട്ടി സിഖ് മത വിശ്വാസിയുമായിരുന്നു. ഇതിൽ ഭൂരിഭാഗം കേസുകളും റിപ്പോർട്ട് ചെയ്യപ്പെട്ടത് സിന്ധ് പ്രവിശ്യയിലാണ്.
