പക്ഷി കൂട്ടങ്ങൾ പറക്കുന്നത് നാം കണ്ടിട്ടുണ്ട്. എന്താണ് അവ പറക്കുന്നതിലെ പ്രത്യേകത! ശ്രദ്ധിച്ചിട്ടുണ്ടോ?. V ആകൃതിയിലാണ് പക്ഷികൾ കൂട്ടമായി പറക്കുന്നത്. എന്താണ് ഇതിന് പിന്നിലെ ശാസ്ത്രമെന്ന് ഒരു വട്ടമെങ്കിലും ചിന്തിച്ചിട്ടുണോ? പക്ഷികൾ V ആകൃതിയിൽ പറക്കുന്നതിന് മൂന്ന് കാരണങ്ങളാണ് ശാസ്ത്രജ്ഞർ പറയുന്നത്.
1. V ആകൃതിയിൽ പക്ഷികൾക്ക് വേഗത്തിൽ പറക്കാൻ സാധിക്കുന്നു.
V ആകൃതിയിൽ പറക്കുന്നതിലൂടെ പക്ഷികൾ തങ്ങളുടെ ഊർജ്ജം ലാഭിക്കുകയാണ്. പക്ഷി കൂട്ടത്തെ നയിച്ചു കൊണ്ട് മുന്നിൽ പോകുന്ന പക്ഷി മാത്രമായിരിക്കും കൂടുതൽ ഊർജ്ജമെടുത്ത് പറക്കുക. വായുവിനെ മുറിച്ചുകടക്കുന്നതിനാലാണിത്. ഈ മുറിച്ചു കടക്കുന്ന വായുവിലൂടെ പിന്നാലെ വരുന്ന പക്ഷികളും മുന്നോട്ട് പറക്കുന്നു. അതിനാൽ പിന്നാലെ വരുന്ന പക്ഷികൾ മുന്നിലുള്ള പക്ഷിയുടെ അത്രയും ഊർജ്ജം പറക്കാൻ ആവശ്യമായി വരുന്നില്ല. ഏറ്റവും പിന്നിലുള്ള പക്ഷികൾ സത്യത്തിൽ സൗജന്യ സഫാരിക്ക് തുല്യമായാണ് പറക്കുന്നത്. ദേശാടന കിളികളോ, അല്ലെങ്കിൽ ദീർഘദൂരം സഞ്ചരിക്കുന്ന കിളികളോ ആണ് ഇത്തരത്തിൽ സഞ്ചിരിക്കുന്നത്. എല്ലാ കിളികളും ഒരേപോലെ ക്ഷീണിക്കാതിരിക്കാൻ ഇങ്ങനെ പറക്കുന്നതിലൂടെ സാധിക്കും.
2. മികച്ച കാഴ്ച ലഭ്യമാകുന്നു
പരസ്പരം നന്നായി ആശയ വിനിമയം നടത്താനും മുന്നിലുള്ള കാഴ്ചകൾ കാണാനും V ആകൃതിയിൽ പറക്കുന്നതുകൊണ്ട് സാധ്യമാവും. പല പക്ഷികളും അതിജീവനത്തിനായി കൂട്ടമായാണ് താമസിക്കുന്നതും സഞ്ചരിക്കുന്നതും. സുരക്ഷിതമായിരിക്കാൻ കൂടിയാണ് ഇവ കൂട്ടമായി പറക്കുന്നത്. ഇങ്ങനെ സുരക്ഷിതമായി പറക്കണമെങ്കിൽ തമ്മിൽ തമ്മിൽ നന്നായി ആശയവിനിമയം സാധ്യമാവണം. അതിന് V ആകൃതിയിൽ പറക്കുന്നത് സഹായകമാവും.
3. നേതാവിനെ പിന്തുടരുന്നു
മൂന്നാമത്തെ സിദ്ധാന്തമായി ഗവേഷകർ പറയുന്നത് പക്ഷികൾ അവരുടെ നേതാവിനെ പിന്തുടുരുന്നു എന്നാണ്. എന്നാൽ, എങ്ങനെയാണ് പക്ഷികൾ തങ്ങളുടെ നേതാവിനെ തിരഞ്ഞെടുക്കുന്നതെന്ന് ഗവേഷകർക്ക് കൃത്യമായി അറിയില്ല. മുന്നിൽ വഴി തെളിച്ച് പറക്കുന്ന പക്ഷി നേതാവ് ആയിരിക്കും. എന്നാൽ, ഒരാൾ ക്ഷീണിച്ചാൽ ആ ഉത്തരവാദിത്വം പിന്നിലുള്ള പക്ഷികൾ മാറിമാറി കൈകാര്യവും ചെയ്യും.
