ഓഹരി മൂല്യം 1 ലക്ഷം കടന്ന ആദ്യ ഇന്ത്യൻ കമ്പനിയെന്ന നേട്ടം സ്വന്തമാക്കി എംആർഎഫ്. ടയർ നിർമ്മാതാക്കളായ എംആർഎഫിന്റെ ഓഹരി മൂല്യമാണ് ഏറെ നാളത്തെ കാത്തിരിപ്പിനൊടുവിൽ ഒരു ലക്ഷം കടന്നത്. നാഷണൽ സ്റ്റോക്ക് എക്സ്ചേഞ്ചിൽ രാവിലെ 10.45ഓടെ മൂല്യം 1,00,000.95 ആകുകയായിരുന്നു. ഒരു വർഷം കൊണ്ട് 46 ശതമാനത്തോളം നേട്ടം എംആർഎഫ് സ്വന്തമാക്കിയെന്നാണ് റിപ്പോർട്ടുകൾ സൂചിപ്പിക്കുന്നത്. 2021 ജനുവരിയിൽ ഓഹരി വില 90,000 ആയിരുന്നു.
ടയറുകൾ നിർമ്മിച്ച് വിതരണം ചെയ്യുന്ന കമ്പനിയാണ് എംആർഎഫ്. പാസഞ്ചർ കാറുകൾ, ഇരുചക്രവാഹനങ്ങൾ, ട്രക്കുകൾ എന്നിവയ്ക്ക് ഉപയോഗിക്കുന്ന ടയറുകളാണ് പ്രധാനമായും നിർമ്മിക്കുന്നത്. 1.48 ശതമാനത്തോളം ഉയർന്ന എംആർഎഫിന്റെ ഓഹരികൾ 1,00,435.95 രൂപ വരെ എത്തിയിരുന്നു. 52 ആഴ്ചയിലെ ഏറ്റവും ഉയർന്ന നിരക്കാണിത്. നേരത്തെ ഓഹരി വില 99,933 രൂപയായി മെയ് എട്ടിന് ഉയർന്നിരുന്നു. അതുവരെ ഉണ്ടായിരുന്ന ഏറ്റവും ഉയർന്ന നിരക്കായിരുന്നു അത്. ചൊവ്വാഴ്ച ഉച്ചയ്ക്ക് 1.30 വരെയുള്ള കണക്കുകൾ പ്രകാരം എംആർഎഫിന്റെ ഓഹരി വില 99,652.55 രൂപയായിരുന്നു.
