വീട് എന്നത്തേയ്ക്കുമുള്ള അസെറ്റാണ്. ആയുസ്സിലൊരിക്കലാണ് നാം വീട് എന്ന സ്വപ്നം സാധ്യമാക്കുന്നത്. എന്നാൽ വീടുനിർമ്മാണം ആരംഭിക്കുന്നതിന് മുമ്പ് അറിഞ്ഞിരിക്കേണ്ട ചില പ്രധാന കാര്യങ്ങളുണ്ട്. വീടുകൾ അതിൽ താമസിക്കുന്ന മനുഷ്യരുടെ ജീവിതവുമായി വളരെയധികം ബന്ധപ്പെട്ട് നിൽക്കുന്നു എന്നാണ് ഭാരതീയ ശാസ്ത്രങ്ങൾ പറയുന്നത്. അതിനാൽ തന്നെ വീടിന് എന്തെങ്കിലും തകരാറുണ്ടെങ്കിൽ അത് അതിൽ താമസിക്കുന്നവരെയും ബാധിക്കാറുണ്ട്. അതുണ്ടാകാതെയിരിക്കാൻ വീടൊരുക്കുമ്പോൾ വാസ്തു നോക്കാറുണ്ട്. വീട് വെക്കുമ്പോൾ അറിഞ്ഞിരിക്കേണ്ട ചില വാസ്തുശാസ്ത്ര സംബന്ധമായ കാര്യങ്ങൾ അറിയാം.
വീടിന്റെ പ്രധാന വാതിൽ കിഴക്കോ വടക്കോ ദിശയിലേയ്ക്ക് ദർശനമായി വേണം സ്ഥാപിക്കാൻ. ഇത് വീട്ടിലേയ്ക്ക് പോസിറ്റീവ് ഊർജ്ജം കടക്കാൻ കാരണമാകുന്നു. വാതിലിലൂടെ വെളിച്ചം വീട്ടിലേയ്ക്ക് എത്തുന്നുണ്ട് എന്നും ഉറപ്പാക്കണം.
വീടിനോട് ചേർന്ന് നിങ്ങൾക്ക് കൃഷി ചെയ്യാൻ താത്പര്യമുണ്ടോ. എങ്കിൽ അതിന് വേണ്ടി കണ്ടെത്തുന്ന ഭൂമിക്ക് കിഴക്കോട്ടോ വടക്കോട്ടോ ചരിവ് ഉണ്ടായിരിക്കുന്നത് കൃഷിയ്ക്ക് ഗുണകരമാണ്. ഇത്തരത്തിലുള്ള ഭൂമിയിൽ കൃഷി ചെയ്താൽ ജലവും മണ്ണിലെ ദാതുക്കളും കൃഷിയ്ക്ക് അനുയോജ്യമായി ലഭിക്കുകയും കൃഷി നന്നാവുകയും ചെയ്യും.
വീടിന്റെ വടക്ക്, കിഴക്ക് ഭാഗങ്ങൾ തുറസ്സായ സ്ഥലങ്ങളായി നിലനിർത്തണം. ഡിസൈനിൽ ഇവിടം പോർട്ടിക്കോ പോലെയുള്ളവ കൊണ്ടുവരുന്നത് വളരെ ഉത്തമമാണ്. വീടിന്റെ പ്ലാൻ തയ്യാറാക്കുമ്പോൾ തന്നെ ഇത് ശ്രദ്ധിക്കണം. സൂര്യപ്രകാശവും അതിലൂടെ പോസിറ്റീവ് ഊർജ്ജവും വീട്ടിൽ നിറയുന്നതിന് ഇത് സഹായകരമാകുന്നു.
കുളം, കിണർ എന്നിവ വീടിന്റെ വടക്കുകിഴക്കോ വടക്കോ ദിശയിലായിരിക്കുന്നതാണ് ഉത്തമം. ഇത് പോസ്റ്റിവ് ഊർജ്ജത്തിന്റെ ഒഴുക്കിന് സഹായകരമാണ്. ഒരു കാരണവശാലും ഇത്തരം ജലസംഭരണികൾ തെക്ക് ഭാഗത്ത് വരാൻ പാടില്ല. ഇത് തീർത്തും ദോഷകരമായാണ് കാണുന്നത്.
മരങ്ങൾ നട്ടുപിടിപ്പിക്കുന്നത് വളരെ അത്യാവശ്യമുള്ള കാര്യമാണ്. തെക്കുപടിഞ്ഞാറ് അല്ലെങ്കിൽ പടിഞ്ഞാറ് ഭാഗത്ത് മരങ്ങൾ നടുകയും പൂന്തോട്ടങ്ങൾ ഒരുക്കുകയുമാകാം എന്നാൽ വലിയ മരങ്ങൾ കിഴക്കോ വടക്കോ നടാതിരിക്കാൻ ശ്രദ്ധിക്കണം. ഇത് മൂലം സൂര്യപ്രകാശം തടയുകയും വീടിനുള്ളിലേയ്ക്ക് ഇത് എത്താതിരിക്കുകയും ചെയ്യാം.
ഇവയെല്ലാം തന്നെ ലഘുവായ വാസ്തുശാസ്ത്ര സംബന്ധമായ അറിവുകളാണ്. പൊതുവായി ശ്രദ്ധിക്കേണ്ട മാർഗ്ഗ നിർദ്ദേശങ്ങൾ മാത്രമാണ്. വീട് വെയ്ക്കുന്നതിന് മുൻപ് ഒരു വാസ്തു ആചാര്യനെ കാണുന്നത് വളരെ ഉചിതമായിരിക്കും. തങ്ങൾ നിർമ്മിക്കാൻ ഉദ്ദേശിക്കുന്ന വീടിന്റെ പ്ലാൻ തയ്യാറാക്കുന്നതിന് മുമ്പ് വാസ്തു സംബന്ധമായ കാര്യങ്ങളിൽ ഉറപ്പ് വരുത്തണമല്ലോ…
Comments