പാരിസ്: പിഎസ്ജി മാനേജ്മെന്റുമായി ഉടക്കി നിൽക്കുന്ന ഫ്രാൻസിന്റെ ഗോളടി യന്ത്രം കിലിയൻ എംബാപ്പെയുടെ വെളിപ്പെടുത്തലിൽ ഞെട്ടി ഫുട്ബോൾ ലോകം.പിഎസ്ജി വിട്ട അർജന്റീനൻ ഇതിഹാസം ലിയോണൽ മെസിയെ കുറിച്ചാണ് സൂപ്പർതാരം മനസ് തുറന്നത്. ‘ഫുട്ബോൾ ചരിത്രത്തിലെ എക്കാലത്തെയും മികച്ച താരങ്ങളിൽ ഒരാളാണ് മെസി. മെസിയെ പോലൊരു താരം ക്ലബ് വിടുന്നത് ഒരിക്കലും സന്തോഷം നൽകുന്ന വാർത്തയല്ല. മെസി പിഎസ്ജി വിട്ടപ്പോൾ ഏറെപ്പേർ ആശ്വാസം കൊണ്ടത് എന്തുകൊണ്ട് എന്ന് എനിക്ക് മനസിലാവുന്നില്ല. അർഹമായ ബഹുമാനം മെസിക്ക് ഫ്രാൻസിൽ ലഭിച്ചില്ല’ എന്നുമാണ് എംബാപ്പെയുടെ വെളിപ്പെടുത്തൽ. എംബപ്പെ ഈ ട്രാൻസ്ഫർ വിൻഡോയോടെ പിഎസ്ജി വിടും എന്നാണ് ഇപ്പോൾ പ്രതീക്ഷിക്കപ്പെടുന്നത്
അതേസമയം വരുന്ന സീസണിൽ സ്പാനിഷ് ക്ലബ് റയൽ മാഡ്രിഡിലേക്ക് ചേക്കേറുമെന്ന വാർത്തകൾ കിലിയൻ എംബാപ്പെ തള്ളി. വാർത്തകൾ അസത്യമെന്ന് താരം ട്വീറ്റ് ചെയ്തു. കരീം ബെൻസേമ ക്ലബ് വിട്ട ഒഴിവിൽ എംബാപ്പെ റയലിലെത്തുമെന്നും ക്ലബ് പ്രസിഡന്റ് ഫ്ലോറന്റീനോ പെരേസുമായി ചർച്ച നടത്തിയെന്നും ഒരു ഫ്രഞ്ച് മാദ്ധ്യമം റിപ്പോർട്ട് ചെയ്തിരുന്നു. എന്നാൽ ഇത് നിഷേധിച്ച് എംബപ്പെ തന്നെ രംഗത്തെത്തിയിരിക്കുകയാണ്. ‘വാർത്ത അസത്യമാണ്. പിഎസ്ജിയിൽ ഒരു സീസൺ കൂടി തുടരുമെന്ന് താൻ നേരത്തെ തന്നെ പറഞ്ഞിരുന്നു. ക്ലബിൽ താൻ സന്തോഷവാനാണ്’- ഇതായിരുന്നു വാർത്തയ്ക്ക് ട്വിറ്ററിലൂടെയുള്ള എംബപ്പെയുടെ മറുപടി.
രണ്ട് വർഷത്തെ പിഎസ്ജി ജീവിതം അവസാനിപ്പിച്ച് മെസി അമേരിക്കയിലെ മേജർ ലീഗ് സോക്കർ ക്ലബായ ഇൻറർ മിയാമിയിലേക്ക് ചേക്കേറിയതിന് പിന്നാലെയാണ് എംബാപ്പെയുടെ പ്രതികരണം.മുൻ ഇംഗ്ലീഷ് താരം ഡേവിഡ് ബെക്കാമിന് ഉടമസ്ഥാവകാശമുള്ള ക്ലബ് കൂടിയാണ് ലിയോണൽ മെസി ചേക്കേറിയിരിക്കുന്ന ഇൻറർ മിയാമി. ലിയോണൽ മെസിയുടെ വരവോടെ അമേരിക്കൻ ഫുട്ബോളിന്റെ മുഖച്ഛായമാറുമെന്ന പ്രതീക്ഷയിലാണ് മേജർ ലീഗ് സോക്കർ അധികൃതർ.
Comments