ശരീരത്തിൽ എത്ര ചെറിയ മുറിവ് ഉണ്ടായാലും ആളുകൾ ഭയപ്പെടുന്നത് ക്യാൻസർ ആണോ എന്നാണ്. അത്തരം ആശങ്ക മനസിൽ കയറിയാൽ പിന്നെ ഊണുമില്ല ഉറക്കവുമില്ല. എന്നാൽ ആ ഭീതിയും രോഗസാധ്യതയും കുറയ്‌ക്കാനുള്ള പഠന റിപ്പോർട്ടാണ് പുറത്തുവന്നിരിക്കുന്നത്. യുഎസിലെ ന്യൂകാസിൽ യൂണിവേഴ്സിറ്റിയിലെ വിദഗ്ധരാണ് പഠനത്തിന്റെ പിന്നിൽ. ക്യാൻസർ എന്ന രോഗത്തിന്റെ പ്രതിരോധ നിർദ്ദേശങ്ങൾ പിന്തുടരുന്ന ആളുകൾക്ക് രോഗം വരാനുള്ള സാധ്യത കുറവാണെന്ന് ഗവേഷകർ കണ്ടെത്തി.
ആരോഗ്യകരമായ ശരീരം നിലനിർത്തുകയും ആരോഗ്യകരമായ ജീവിതശൈലി നയിക്കുകയും ചെയ്യുന്ന ഒരു വ്യക്തിയ്‌ക്ക് ക്യാൻസർ പിടിപ്പെടാനുള്ള സാധ്യത വളരെ കുറവാണെന്ന് ഗവേഷകർ വ്യക്തമാക്കി. ജീവിതശൈലിയിൽ മാറ്റം വരുത്തുന്നവർ, ഫാസ്റ്റ് ഫുഡും കഴിയ്‌ക്കുന്നവർ, അമിത വണ്ണമുള്ളവർ എന്നിവരിലാണ് ക്യാൻസർ രോഗങ്ങൾ കൂടുതലായും കണ്ടുവരുന്നത്. എന്നാൽ ക്യാൻസറിന്റെ പ്രതിരോധ നിർദ്ദേശങ്ങൾ ശ്രദ്ധിച്ചാൽ ക്യാൻസറിന്റെ സാധ്യതകൾ കുറയ്‌ക്കാൻ സഹായിക്കും. പുകയില ഉപയോഗം, ആഹാരത്തിൽ ക്രമീകരണം ഇല്ലായ്മ, മദ്യപാനം എന്നീ ജീവിതശൈലി പരിഷ്‌കരണങ്ങളാണ് 40 ശതമാനം ക്യാൻസർ രോഗങ്ങളുടെയും കാരണം.
ആരോഗ്യകരമായ ജീവിതത്തിന് ഏറ്റവും പ്രധാനമായും വേണ്ടതാണ് വ്യായാമം. അതിനാൽ ദിവസേന വ്യായാമം ചെയ്യാൻ സമയം കണ്ടെത്തുക, ധാന്യങ്ങൾ, പച്ചക്കറികൾ, പഴങ്ങൾ, ബീൻസ് എന്നിവ അടങ്ങിയ ഭക്ഷണം കഴിക്കുക, ഫാസ്റ്റ് ഫുഡുകൾ കുറയ്‌ക്കുക, പഞ്ചസാര എന്നിവ അടങ്ങിയ ഭക്ഷണപദാർത്ഥങ്ങൾ പരിമിതപ്പെടുത്തുക, ബേക്കൺ മാംസങ്ങൾ പൂർണമായും ഒഴിവാക്കുക. ഇവ ശ്രദ്ധിച്ചാൽ ക്യാൻസർ രോഗത്തിനുള്ള സാധ്യത പരമാവധി കുറയ്‌ക്കാൻ സാധിക്കും.
ക്യാൻസർ പ്രതിരോധ നിർദ്ദേശങ്ങൾ പാലിക്കുന്നതിലൂടെ കുടൽ ക്യാൻസറിനുള്ള സാധ്യത 12 ശതമാനവും ,സ്തനാർബുദ സാധ്യത 11 ശതമാനവും, ശ്വാസകോശ അർബുദത്തിനുള്ള സാധ്യത എട്ട് ശതമാനവും കുറയുമെന്ന് ശാസ്ത്രജ്ഞർ വ്യക്തമാക്കി. ചുവന്നതും ബേക്കൺ ചെയ്തതുമായ മാംസങ്ങൾ കഴിക്കുന്നത് കുടൽ ക്യാൻസറിനുള്ള സാധ്യത വർദ്ധിപ്പിക്കും. മദ്യം കഴിക്കുന്നത് സ്തനങ്ങൾ, കുടൽ, അന്നനാളം എന്നിവിടങ്ങളിലെ ക്യാൻസർ സാധ്യത വർദ്ധിപ്പിക്കുമെന്നും ഗവേഷകർ പറയുന്നു.
