മലപ്പുറം: പെറ്റമ്മയോളം സ്നേഹം നൽകി നോക്കിവളർത്തിയ പൊറ്റമ്മയുടെ ആഗ്രഹം നിറവേറ്റി ഒരുമകൻ. തിരുനാവായ എടക്കുളം സ്വദേശി കുറുംബയമ്മയുടെ അബുദാബി കാണാനുള്ള മോഹമാണ്അയൽവാസിയായ അസീസ് കാളിയാടൻ നിറവേറ്റിയത്.
അസീസിനെയും 9 സഹോദരങ്ങളെയും നോക്കി വളർത്തിയത് അയൽവാസികളായ അയ്യപ്പനും കറുപ്പയും മകൾ കുറുംബയുമായിരുന്നു. അസീസിന്റെ ഉമ്മയ്ക്ക് സഹോദര തുല്യയായിരുന്നു കുറുംബ. സ്വന്തം മക്കൾക്ക് തുല്യം സ്നേഹം ചൊരിഞ്ഞാണ് ഈ കുടുംബം അസീസിനെയും സഹോദരന്മാരെയും നോക്കിയത്
മുൻപ് ബുദ്ധിമുട്ടുണ്ടായിരുന്ന സമയത്ത് അസീസിന്റെ കുടുംബത്തെ ഒരു കുറവും കൂടാതെ നോക്കിയിരുന്നതും കറുപ്പയും കുറുംബയുമായിരുന്നു. കാലങ്ങൾ കഴിഞ്ഞു. ഇതിനിടെ അസീസ് ഗൾഫിലെത്തി. കുറുംബയ്ക്കും ഗൾഫ് കാണണമെന്നൊരു മോഹമുണ്ടായി. തെല്ലൊന്ന് ആലോചിക്കാതെ ഏറ്റവും അടുത്തനിമിഷം ആഗ്രഹം നിറവേറ്റുകയായിരിന്നു.ഭാര്യയ്ക്കും മക്കൾക്കുമൊപ്പമാണ് കുറുംബയെ അബുദാബിയിൽ എത്തിച്ചത്. ഇത്തവണ അബുദാബിയിൽ നടക്കുന്ന മലപ്പുറം കൂട്ടായ്മയിൽ മുഖ്യാതിഥി കുറുംബയാണ്. അസീസ് സാമൂഹികപ്രവർത്തകനും കെഎംസിസി നേതാവുമാണ്.
