മുംബൈ: ഇന്ത്യൻ ടീമിലെ പൊളിച്ചെഴുത്തിന്റെ ഭാഗമായി അടുത്തമാസം നടക്കാനിരിക്കുന്ന വെസ്റ്റ് ഇൻഡീസിനെതിരായ ടെസ്റ്റ് പരമ്പരയിൽ ക്യാപ്റ്റൻ രോഹിത് ശർമ്മയെ ഒഴിവാക്കുമെന്ന് സൂചന.
വിശ്രമം നൽകുമെന്നാണ് ബി.സി.സി.ഐ വൃത്തങ്ങളുടെ വിശദീകരണം. അങ്ങനെയെങ്കിൽ മുൻ വൈസ് ക്യാപ്റ്റൻ അജിങ്ക്യാ രഹാനയ്ക്ക് നറുക്ക് വീണേക്കും. ബാറ്റിംഗിൽ ഫോമിലല്ലാതിരുന്ന രോഹിത്തിന്റെ ശാരീരികക്ഷമതയെക്കുറിച്ചും വിമർശനങ്ങൾ ഉയർന്നിരുന്നു.
ഐപിഎല്ലിൽ മുംബൈയെ പ്ലേ ഓഫിലെത്തിക്കാനായെങ്കിലും ബാറ്റിംഗിൽ രോഹിത് നിരാശപ്പെടുത്തിയിരുന്നു. 16 മത്സരങ്ങളിൽ 20.75 ശരാശരിയിൽ രണ്ട് അർധസെഞ്ചുറി അടക്കം 332 റൺസ് മാത്രമാണ് ഐപിഎല്ലിൽ രോഹിത്തിന് നേടാനായത്. പിന്നാലെ നടന്ന ലോക ടെസ്റ്റ് ചാമ്പ്യൻഷിപ്പ് ഫൈനലിലും രോഹിത് ബാറ്റിംഗിൽ നിരാശപ്പെടുത്തി. ഐപിഎല്ലിൽ ചെന്നൈ സൂപ്പർ കിംഗ്സിനായി നടത്തിയ മിന്നുന്ന പ്രകടനങ്ങളുടെ കരുത്തിലാണ് രഹാനെ ഒന്നരവർഷത്തിനുശേഷം ടെസ്റ്റ് ടീമിൽ തിരിച്ചെത്തിയത്. ലോക ടെസ്റ്റ് ചാമ്പ്യൻഷിപ്പ് ഫൈനലിൽ കളിച്ച രഹാനെ ആദ്യ ഇന്നിംഗ്സിൽ ഇന്ത്യയുടെ ടോപ് സ്കോററായിരുന്നു.
വെസ്റ്റ് ഇൻഡീസിനെതിരായ പരമ്പരക്കുള്ള ടെസ്റ്റ്, ഏകദിന, ടി20 ടീമുകളെ ബിസിസിഐ സെലക്ഷൻ കമ്മറ്റി ഈ മാസം 27ന് പ്രഖ്യാപിച്ചേക്കും. അടുത്ത 12ന് ഡൊമനിക്കയിലാണ് വെസ്റ്റ് ഇൻഡീസിനെതിരായ ആദ്യ ടെസ്റ്റ്. 20ന് ട്രിനിഡാഡിൽ രണ്ടാം ടെസ്റ്റ് തുടങ്ങും. ജൂലൈ 27 മുതൽ മൂന്ന് മത്സരങ്ങളടങ്ങിയ ഏകദിന പരമ്പരയിലും തുടർന്ന് അഞ്ച് മത്സരങ്ങളുടെ ടി20 പരമ്പരയിലും ഇന്ത്യ കളിക്കും. ഓഗസ്റ്റ് 31നാണ് ഏഷ്യാ കപ്പ് തുടങ്ങുക.
