യുക്രെയ്ൻ പ്രസിഡന്റ് വൊളോഡിമിർ സെലൻസ്കിക്ക് സമ്മാനമായി ബർഫി നൽകുന്ന യുകെ പ്രധാനമന്ത്രി ഋഷി സുനകിന്റെ വീഡിയോ സോഷ്യൽമീഡിയയിൽ തരംഗമാകുന്നു. ഋഷി സുനകിന്റെ അമ്മ അദ്ദേഹത്തിന് വേണ്ടി പ്രത്യേകം തയ്യാറാക്കിയ ബർഫി (ഇന്ത്യൻ മധുരപലഹാരം) സെലൻസ്കിക്ക് നൽകുന്ന വീഡിയോയാണ് ഇൻസ്റ്റഗ്രാമിൽ വൈറലാകുന്നത്.
” തനിക്ക് കഴിക്കാൻ അമ്മ ബർഫി ഉണ്ടാക്കി നൽകിയിരുന്നു. അന്നേദിവസം സെലൻസ്‌കിയെ കാണാൻ ഇടയായി. അദ്ദേഹവുമായി സംസാരിച്ചിരിക്കുമ്പോൾ സെലൻസ്‌കി വിശക്കുന്നതായി സൂചിപ്പിച്ചു. അപ്പോൾ തന്റെ കൈവശമിരുന്ന ബർഫി സെലൻസ്കിക്ക് കൈമാറി. അദ്ദേഹം അത് ഇഷ്ടത്തോടെ കഴിച്ചു. ഇതറിഞ്ഞ് അമ്മയ്‌ക്ക് ഒരുപാട് സന്തോഷമായി. ശരിക്കും അമ്മ ത്രില്ല്ഡ് ആയി. ” വീഡിയോയിൽ ഋഷി സുനക് പറഞ്ഞു. ഒരു അഭിമുഖത്തിനിടെയാണ് അദ്ദേഹം ഇക്കാര്യം പരാമർശിച്ചത്. ഇതിന്റെ വീഡിയോ ദൃശ്യങ്ങൾ യുകെ പ്രധാനമന്ത്രി തന്നെയാണ് അദ്ദേഹത്തിന്റെ ഇൻസ്റ്റഗ്രാം അക്കൗണ്ടിലൂടെ പങ്കുവച്ചതെന്ന പ്രത്യേകതയുമുണ്ട്.
ബർഫി പങ്കുവയ്‌ക്കുന്ന വീഡിയോ ദൃശ്യങ്ങൾ ഇരുകൈയ്യും നീട്ടിയാണ് ഇന്ത്യക്കാർ സ്വീകരിച്ചത്. ഇന്ത്യൻ മധുരപലഹാരം കഴിച്ചാൽ ഇഷ്ടപ്പെടാത്തവരായി ഈ ലോകത്ത് ആരുണ്ടെന്നും മകന് ബർഫിയുണ്ടാക്കി നൽകിയ അമ്മയുടെ വാത്സല്യവുമെല്ലാം കമന്റുകളിൽ ചർച്ചയാവുകയാണ്.
