താനെ: കോൺഗ്രസ് പാർട്ടി ദേശീയ അദ്ധ്യക്ഷനായിരുന്ന രാഹുൽ ഗാന്ധിയുടെ പിറന്നാൾ ദിനം വൈവിധ്യമാർന്ന രീതിയിൽ ആഘോഷിക്കാനുള്ള ശ്രമത്തിലായിരുന്നു രാജ്യമെമ്പാടുമുള്ള കോൺഗ്രസ് പ്രവർത്തകർ. വിവിധയിടങ്ങളിൽ രാഹുലിന്റെ പോസ്റ്ററുകൾ ഉയർത്തിയായിരുന്നു അവർ രാഹുലിന് ആശംസകളറിയിച്ചത്. ഇതിലൊരു പോസ്റ്ററാണ് ഇപ്പോൾ വൈറലാവുന്നത്.
അടുത്ത പ്രധാനമന്ത്രി രാഹുൽ ഗാന്ധിയെന്നായിരുന്നു പോസ്റ്ററിലുണ്ടായിരുന്നത്. മഹാരാഷ്ട്രയിലെ താനെയിലായിരുന്നു ആശംസാ പോസ്റ്റർ ഉയർന്നത്. നഫ്രത്ത് ഛോടോ, ഭാരത് ജോഡോ എന്നെഴുതിയ പോസ്റ്ററിൽ കോൺഗ്രസ് പ്രവർത്തകർക്കൊപ്പം ഭാരത് ജോഡോ യാത്ര നടത്തുന്ന രാഹുൽ ഗാന്ധിയെ കാണാം. വയനാട് എംപിക്ക് പിറന്നാൾ ആശംസകൾ എഴുതിയിരിക്കുന്ന പോസ്റ്ററിൽ നിരവധി ദേശീയ നേതാക്കളുടെ മുഖങ്ങളും ഉൾപ്പെടുത്തിയിട്ടുണ്ട്. പോസ്റ്ററിന്റെ ചിത്രം സോഷ്യൽ മീഡിയയിൽ പങ്കുവച്ചതോടെയാണ് സംഗതി വൈറലായത്.
പാർട്ടി അദ്ധ്യക്ഷ സ്ഥാനം പോലും ഉത്തരവാദിത്വത്തോടെ നടപ്പിലാക്കാൻ കഴിയാതെ ചുമതലയിൽ നിന്ന് ഒഴിഞ്ഞ നേതാവിനെയാണോ രാജ്യത്തിന്റെ പ്രധാനമന്ത്രിയായി കോൺഗ്രസ് പാർട്ടി സ്വപ്നം കാണുന്നതെന്നായിരുന്നു വിമർശനം.
