കഴിഞ്ഞ ദിവസമാണ് തെന്നിന്ത്യൻ താരം രാംചരണിനും ഉപാസന കാമിനേനിയ്ക്കും പെൺകുഞ്ഞ് പിറന്നത്. പത്ത് വർഷത്തെ കാത്തിരിപ്പിനൊടുവിലാണ് കൺമണിയെ ലഭിച്ചത്. താരദമ്പതികളെ പോലെ തന്നെ ആകാംക്ഷയിലും സന്തോഷത്തിലുമാണ് തെലുങ്ക് സിനിമാ ലോകവും. എന്നാൽ ഇതിനിടയിൽ കുഞ്ഞിന്റെ ചിത്രമെന്ന പേരിൽ ചിത്രങ്ങൾ സമൂഹമാദ്ധ്യമങ്ങളിൽ പ്രചരിക്കുന്നുണ്ട്.
നിരവധി പേരാണ് ചിത്രം ഷെയർ ചെയ്തിരിക്കുന്നത്. ആശുപത്രിയിൽ നിന്ന് ആരോ കുഞ്ഞിന്റെ ചിത്രം പകർത്തി പങ്കുവെച്ചെന്നാണ് റിപ്പോർട്ട്. രാംചരണിന്റെ മകളെന്ന തലക്കെട്ടോടെയാണ് ചിത്രം പ്രചരിക്കുന്നത്. ആശുപത്രി കിടക്കയിൽ ശാന്തമായി ഉറങ്ങുന്ന കുഞ്ഞിന്റെ ചിത്രമാണ് സോഷ്യൽ മീഡിയ ഏറ്റെടുത്തിരിക്കുന്നത്. ചിത്രം വൈറലായതിന് പിന്നാലെ നിർണായക വെളിപ്പെടുത്തലുമായി രാംചരണിന്റെ ഡിജിറ്റൽ മാനേജർ ശിവ ചെറി രംഗത്തെത്തി. ഇന്റർനെറ്റ് ലോകത്ത് പ്രചരിക്കുന്ന ചിത്രത്തിലുള്ള കുഞ്ഞ് രാംചരണിന്റെയും ഉപാസനയുടെയും മകളല്ലെന്നാണ് അദ്ദേഹം പറഞ്ഞത്. ട്വിറ്ററിലൂടെയാണ് അദ്ദേഹം ഇക്കാര്യം വെളിപ്പെടുത്തിയത്. ‘ സോഷ്യൽ മീഡിയയിൽ പ്രചരിക്കുന്ന ചിത്രങ്ങൾ മെഗാ പ്രിൻസസിന്റെ ചിത്രങ്ങളല്ല’ എന്നാണ് ശിവ ചെറി കുറിച്ചത്.
ചിരഞ്ജീവിയാണ് കൊച്ചുമകളെ ‘മെഗാ പ്രിൻസസ്’ എന്ന ഓമനപ്പേരിൽ വിളിച്ചത്. ഉപാസന പെൺകുഞ്ഞിന് ജന്മം നൽകിയ വാർത്ത ലോകത്തെ ആദ്യം അറിയിച്ചതും ചിരഞ്ജീവിയായിരുന്നു. ‘സ്വാഗതം കുഞ്ഞ് വലിയ രാജകുമാരി, അനുഗ്രഹീതരായ മാതാപിതാക്കൾക്കും ഞങ്ങൾക്കും സന്തോഷവും അഭിമാനവും’ എന്നാണ് അദ്ദേഹം ട്വിറ്ററിൽ കുറിച്ചത്. ഇതിന് പിന്നാലെയാണ് മെഗാ പ്രിൻസസ് എന്ന ഹാഷ്ടാഗ് വൈറലായി മാറിയത്.
