മീററ്റ് ; തദ്ദേശ സ്വയംഭരണ തെരഞ്ഞെടുപ്പിന് പിന്നാലെ കോർപ്പറേഷൻ, മുനിസിപ്പൽ കൗൺസിലുകളിലും ചരിത്രപ്രാധാന്യമുള്ള സ്ഥലങ്ങളുടെ പേര് മാറ്റൽ നടപടികൾ ആരംഭിച്ചിട്ടുണ്ട്. മീററ്റിലെയും ദേവ്ബന്ദിലെയും ആദ്യ യോഗത്തിൽ ഇതു സംബന്ധിച്ച പ്രമേയങ്ങൾ പാസാക്കി. പേര് മാറ്റൽ നയത്തിന് യോഗി സർക്കാർ അനുമതിയും നൽകി .
പഴയ ബീഗം പൂൾ ഇന്റർസെക്‌ഷന്റെ പേര് ഭാരത് മാതാ ചൗക്ക് എന്ന് പുനർനാമകരണം ചെയ്തിട്ടുണ്ടെന്ന് മീററ്റ് മേയർ ഹരികാന്ത് അലുവാലിയ പറഞ്ഞു. ഇതോടൊപ്പം എൽജ് സ്ക്വയറിന്റെ പുതിയ പേര് മാധവ് ചൗക്ക് എന്നാക്കി മാറ്റിയിട്ടുണ്ട്. വന്ദേമാതരം പാടി മാത്രമേ ഇനി ചടങ്ങുകൾ ആരംഭിക്കൂവെന്നും എല്ലാവരും തീർച്ചയായും ബഹുമാനാർത്ഥം എഴുന്നേൽക്കണമെന്നും ഹരികാന്ത് അലുവാലിയ പറഞ്ഞു.
ദിയോബന്ദിൽ ഗാഡോ വാലെ ചൗക്കിനെ സർദാർ ഭഗത് സിംഗ് ചൗക്ക് എന്നും അബ്കാരി റോഡിനെ സർദാർ പട്ടേൽ മാർഗ് എന്നും മജ്നു റോഡിനെ അഷ്ഫഖുള്ള ഖാൻ റോഡ് എന്നും പുനർനാമകരണം ചെയ്തു . ദിയോബന്ദ് മുനിസിപ്പൽ കൗൺസിലാണ് ഇത് സംബന്ധിച്ച പ്രസ്താവന പുറത്തിറക്കിയത്.
