ന്യൂയോർക്ക്: നരേന്ദ്രമോദിയുടെ ചിത്രം ടൈംസ് സ്ക്വയറിൽ പ്രദർശിപ്പിച്ച് ഇന്ത്യൻ പ്രധാനമന്ത്രിയുടെ സന്ദർശനത്തെ സ്വാഗതം ചെയ്ത് അമേരിക്ക. പ്രധാനമന്ത്രി നരേന്ദ്രമോദി യുഎസ് പ്രസിഡന്റ് ജോ ബൈഡനൊപ്പം നിൽക്കുന്ന ചിത്രമാണ് ബിൽബോർഡിൽ പ്രദർശിപ്പിച്ചത്. ‘യുഎസ് സന്ദർശനം നടത്തുന്ന ബഹുമാനപ്പെട്ട ഇന്ത്യൻ പ്രധാനമന്ത്രി നരേന്ദ്രമോദിയെ ഇന്ത്യൻ-അമേരിക്കൻ സമൂഹം സ്വാഗതം ചെയ്യുന്നു’ എന്ന സ്ക്രോളിംഗ് സന്ദേശത്തോടെയാണ് ഇരുവരുടെയും ചിത്രങ്ങളടങ്ങിയ ബാനർ പ്രദർശിപ്പിക്കപ്പെട്ടത്.
അതേസമയം, പ്രധാനമന്ത്രി നരേന്ദ്രമോദിയും യുഎസ് പ്രസിഡന്റ് ജോ ബൈഡനും തമ്മിൽ ഇന്ത്യ അമേരിക്ക ഉഭയകക്ഷി ചർച്ച നടത്തി. ലോകനന്മ, സമാധാനം, സ്ഥിരത, സമൃദ്ധി എന്നിവയ്ക്കായി ഒരുമിച്ച് പ്രവർത്തിക്കാൻ പ്രതിജ്ഞാബദ്ധമാണ് ഇരുരാജ്യങ്ങളുമെന്ന് പ്രധാനമന്ത്രിയും ജോ ബൈഡനും പറഞ്ഞു. ഇന്ത്യയും യുഎസും ജനാധിപത്യ മൂല്യങ്ങളിൽ അധിഷ്ഠിതമാണെന്നും ഇരു രാജ്യങ്ങളും വൈവിധ്യത്തിൽ അഭിമാനിക്കുന്നുവെന്നും പ്രധാനമന്ത്രി പറഞ്ഞു.
അമേരിക്കൻ സന്ദർശനത്തിനായി വൈറ്റ് ഹൗസിലെത്തിയ പ്രധാനമന്ത്രി മോദിക്ക് വൻ വരവേൽപ്പാണ് ലഭിച്ചത്. യുഎസ് പ്രസിഡന്റ് ബൈഡനും പ്രഥമ വനിത ജിൽ ബൈഡനും വൈറ്റ് ഹൗസിൽ അദ്ദേഹത്തെ സ്വീകരിച്ചു. വൈസ് പ്രസിഡന്റ് കമലാ ഹാരിസ്, യുഎസ് സ്റ്റേറ്റ് സെക്രട്ടറി ആന്റണി ബ്ലിങ്കെൻ, യുഎസ് പ്രതിരോധ സെക്രട്ടറി ലോയ്ഡ് ഓസ്റ്റിൻ എന്നിവരുടെ നേതൃത്വത്തിലുള്ള യുഎസ് പ്രതിനിധി സംഘവും പ്രധാനമന്ത്രി മോദിയെ സ്വാഗതം ചെയ്യാൻ വൈറ്റ് ഹൗസിൽ എത്തിയിരുന്നു. വിദേശകാര്യ മന്ത്രി എസ് ജയശങ്കർ, എൻഎസ്എ അജിത് ഡോവൽ, വിദേശകാര്യ സെക്രട്ടറി വിനയ് ക്വാത്ര, യുഎസിലെ ഇന്ത്യൻ അംബാസഡർ തരൺജിത് സന്ധു എന്നിവരാണ് ഇന്ത്യൻ പ്രതിനിധി സംഘത്തിലുണ്ടായിരുന്നത്.
