മാഞ്ചസ്റ്റർ സിറ്റി വിട്ട ഇൽകായ് ഗുണ്ടോഗൻ ഇനി ബാഴ്‌സലോണയ്‌ക്ക് വേണ്ടി കളിമെനയും. സിറ്റിക്കൊപ്പം കഴിഞ്ഞ സീസണിലെ മൂന്ന് പ്രധാന കിരീടങ്ങൾ നേടിയിട്ടാണ് താരത്തിന്റെ ബാഴ്‌സയിലേക്കുള്ള വരവ്. 2025വരെയുള്ള കരാർ ആണ് ഗുണ്ടോഗൻ ഒപ്പുവെച്ചത്. 2026വരെ കരാർ നീട്ടാനുള്ള വ്യവസ്ഥയും ഉണ്ട്. 400 മില്യൺ ആണ് താരത്തിന്റെ റിലീസ് ക്ലോസ്. താരം മ്യൂണിച്ചിൽ കഴിഞ്ഞ ആഴ്ച തന്നെ മെഡിക്കൽ പരിശോധന പൂർത്തിയാക്കിയിരുന്നു.
സിറ്റിയുടെ പുതിയ കരാറും പ്രിമിയർ ലീഗിൽ നിന്നു തന്നെയുള്ള ഓഫറുകളും മറികടന്ന് ആണ് ബാഴ്‌സലോണ ഗുണ്ടോഗനെ സ്വന്തമാക്കിയത്. ബാഴ്സ സെർജിയോ ബുസ്‌ക്വറ്റ്‌സിന്റെ വിടവ് നികത്താൻ കൂടിയാണ് 32കാരനായ ഗുണ്ടോഗനെ ടീമിലേക്ക് എത്തിക്കുന്നത്. നേരത്തെ ഇനിഗോ മർട്ടിനസുമായും കരാറിൽ ഒപ്പിട്ട ബാഴ്സ ട്രാൻസ്ഫർ വിൻഡോയിൽ എത്തിക്കുന്ന രണ്ടാമത്തെ താരമാണ് ഗുണ്ടോഗൻ.
അവസാന ഏഴ് വർഷമായി മാഞ്ചസ്റ്റർ സിറ്റിക്ക് ഒപ്പം ഗുണ്ടോഗൻ ഉണ്ടായിരുന്നു. സിറ്റിക്ക് ഒപ്പം ചാമ്പ്യൻസ് ലീഗ് അടക്കം 14 കിരീടങ്ങൾ ഈ സമയത്ത് ഗുണ്ടോഗൻ നേടിയിരുന്നു.സിറ്റിക്കായി മുന്നൂറിലേറെ മത്സരങ്ങളിൽ കളത്തിലിറങ്ങിയ താരം സിറ്റിയുടെ മധ്യനിരയിലെ പ്രധാനിയായിരുന്നു.ഗുണ്ടോഗൻ ക്ലബ്ബ് വിടുമെന്ന് ഉറപ്പായതോടെ സിറ്റി ഉടൻ തന്നെ ചെൽസിയിൽ നിന്ന് മത്തിയോ കൊവാച്ചിച്ചിനെ ടീമിലെത്തിച്ചിരുന്നു.
