തെങ്കാശി: വൈക്കോൽ ലോറി കടത്തിവിടാൻ 500 രൂപ കൈക്കൂലി ആവശ്യപ്പെട്ട എസ്ഐയ്ക്ക് സസ്പെൻഷൻ. സബ് ഇൻസ്പെക്ടർ ജെയിംസിനെയാണ് കൈക്കൂലി കേസിൽ സസ്പെൻഡ് ചെയ്തത്. തിങ്കളാഴ്ച രാത്രിയാണ് സംഭവം. തെങ്കാശി എസ്പി സാംസണാണ് നടപടി സ്വീകരിച്ചത്. സംഭവ സമയത്ത് എസ്ഐയ്ക്കൊപ്പമുണ്ടായിരുന്ന രണ്ട് ഉദ്യോഗസ്ഥരെ ക്യാമ്പിലേക്ക് മാറ്റുകയും ചെയ്തു.
ചെങ്കോട്ടയിൽ നിന്ന് വൈക്കോലുമായി കേരളത്തിലേക്ക് വന്ന ലോറിയിൽ അമിത ലോഡുണ്ടെന്ന് പറഞ്ഞാണ് ലോറി ഡ്രൈവറോട് എസ്ഐ കൈക്കൂലി ആവശ്യപ്പെട്ടത്. എന്നാൽ ഡ്രൈവർ 100 രൂപയാണ് നൽകിയത്. സംഭവം മുഴുവൻ ഡ്രൈവർ മൊബൈലിൽ ചിത്രീകരിക്കുകയും ഈ വീഡിയോ എസ്പിയ്ക്ക് അയച്ചു കൊടുക്കുകയുമായിരുന്നു.
തമിഴ്നാട്ടിൽ നിന്ന് പുളിയറ ചെക്ക്പോസ്റ്റ് വഴി പ്രതിദിനം നിരവധി വാഹനങ്ങളാണ് കേരളത്തിലേക്ക് എത്തുന്നത്. രാത്രി സമയത്ത് അതിർത്തി കടന്നുവരുന്ന വാഹനങ്ങളിൽ ഭൂരിഭാഗവും ചരക്കുവാഹനങ്ങളാണ്.
