ഇന്ത്യൻ ക്രിക്കറ്റ് താരം ഋഷഭ് പന്ത് തന്റെ ഇൻസ്റ്റഗ്രാം ബയോയിൽ വരുത്തിയ മാറ്റങ്ങൾ ഇപ്പോൾ സമൂഹമാദ്ധ്യമങ്ങളിൽ ശ്രദ്ധ ആകർഷിച്ചിരിക്കുകയാണ്. 25-കാരനായ താരം തന്റെ രണ്ടാം ജനന തീയതിയാണ് ബയോയിൽ ഉൾപ്പെടുത്തിയിരിക്കുന്നത്.തന്റെ രണ്ടാം ജനനതീയതി എന്ന നിലയിൽ വാഹനാപകടം നടന്ന ശേഷം ആറാം ദിനം താൻ ജീവിതത്തിലേക്ക് തിരികെ വന്ന ദിനം ചൂണ്ടി കാണിച്ചുകൊണ്ടാണ് താരം ബയോയിൽ മാറ്റം വരുത്തിയിരിക്കുന്നത്.
2022 ഡിസംബർ 30-ന് പുലർച്ചെ പന്ത് ഡൽഹിയിൽ നിന്ന് ജന്മനാടായ റൂർക്കിയിലേക്ക് യാത്ര ചെയ്യവേയായിരുന്നു താരത്തിന് അപകടം സംഭവിക്കുന്നത്. കാർ ഹൈവേയിലെ ഡിവൈഡറിൽ ഇടിച്ച് താരത്തിന് ഗുരുതരമായി പരിക്കേൽക്കുകയായിരുന്നു. പ്രദേശവാസികളാണ് അദ്ദേഹത്തെ ആശുപത്രിയിൽ പ്രവേശിപ്പിച്ചത്. ഒന്നിലധികം ശസ്ത്രക്രിയകൾക്ക് ശേഷം താരം ഇപ്പോൾ ബെംഗളൂരുവിലെ ദേശീയ ക്രിക്കറ്റ് അക്കാദമിയിൽ സുഖം പ്രാപിച്ച് വരികയാണ്.
തന്റെ രണ്ടാം ജനനത്തീയതി 2023 ജനുവരി അഞ്ചിന് എന്ന് രേഖപ്പെടുത്തുകയായിരുന്നു. ഇതിൽ നിന്നും അപകട ശേഷം എത്ര ഗുരുതരാവസ്ഥയിലൂടെയാണ് അദ്ദേഹം കടന്നു പോയതെന്നും ജീവൻ നഷ്ടപ്പെടുമോ എന്ന ആശങ്കയിൽ മുന്നോട്ട് നീങ്ങിയ മണിക്കൂറുകൾ ഇതിൽ നിന്നും വ്യക്തമാണ്. ഇപ്പോൾ ദേശീയ ക്രിക്കറ്റ് അക്കാദമിയിൽ നിന്ന് പുറത്തു വരുന്ന റിപ്പോർട്ടുകൾ അനുസരിച്ച് പന്ത് വിചാരിച്ചതിലും വേഗത്തിൽ കളിക്കളത്തിൽ തിരികെയെത്തിയേക്കാം. എന്നാൽ ലോക കപ്പ് സമയത്ത് താരം തിരികെയെത്തുമോ എന്നതിൽ വ്യക്തത വന്നിട്ടില്ല. ലോകകപ്പ് ഒരുക്കങ്ങളിൽ പന്ത് ഇല്ലാത്തത് ടീമിന് പ്രതിസന്ധി സൃഷ്ടിച്ചേക്കാം എന്നാണ് വിദഗ്ധരുടെ വിലയിരുത്തൽ.
Comments