ഡൽഹി: ഇന്ത്യയുടെ എക്കാലത്തെയും മികച്ച പേസ് ബൗളർമാരിൽ ഒരാളായ അജിത് അഗാർക്കർ ഇന്ത്യയുടെ മുഖ്യ സെലക്ടറായേക്കുമെന്ന് സൂചന. ഒളി ക്യാമറ വിവാദത്തിൽപ്പെട്ട് ചേതൻ ശർമ്മ പുറത്തുപോയതിന് ശേഷം ശിവസുന്ദർ ദാസാണ് മുഖ്യ സെലക്ടറുടെ ചുമതല വഹിക്കുന്നത്. അഗാർക്കറും ഫ്രാഞ്ചൈസിയും പിരിഞ്ഞതായി ഡൽഹി ക്യാപിറ്റൽസ് ട്വിറ്ററിലൂടെ ആരാധകരെ അറിയിച്ചിരുന്നു.
കഴിഞ്ഞ സീസണിൽ ക്യാപ്റ്റൽസിന്റെ സഹ പരിശീലകനായിരുന്നു അഗാർക്കർ. ടീമിന്റെ മറ്റൊരു അസിസ്റ്റന്റ് കോച്ചായിരുന്നു ഓസീസ് മുൻ ഓൾറൗണ്ടർ ഷെയ്ൻ വാട്സണുമായും ഡൽഹി ക്യാപിറ്റൽസ് വേർപിരിഞ്ഞതായി വ്യക്തമാക്കി.നേരത്തെയും അജിത് അഗാർക്കറിന്റെ പേര് സെലക്ടർ സ്ഥാനത്തേക്ക് ഉയർന്നു വന്നെങ്കിലും ചേതൻ ശർമ്മ അപ്രതീക്ഷിതമായി കടന്നു വരികയായിരുന്നു.
ജൂൺ 30 ആണ് പുതിയ സെലക്ടറുടെ സ്ഥാനത്തേക്ക് അപേക്ഷിക്കാനുള്ള അവസാന തിയതി. ജൂലൈ 1 മുതൽ അഭിമുഖങ്ങൾ നടക്കാനാണ് സാദ്ധ്യത. മുഖ്യ സെലക്ടർ സ്ഥാനമായതിനാൽ പരിചയസമ്പന്നനായ താരം എന്ന നിലയ്‌ക്ക് അജിത് അഗാർക്കറിന് നറുക്ക് വീഴാൻ സാദ്ധ്യതയുണ്ട്. ടീം ഇന്ത്യയെ 26 ടെസ്റ്റിലും 191 ഏകദിനങ്ങളിലും 4 രാജ്യാന്തര ടി20കളിലും അഗാർക്കർ പ്രതിനിധീകരിച്ചിട്ടുണ്ട്. ടെസ്റ്റിൽ സെഞ്ച്വറി നേടിയ ചുരുക്കം പേസർമാരിൽ ഒരാളാണ് അജിത് അഗാർക്കർ
2007ൽ ട്വൻറി 20 ലോകകപ്പ് നേടിയ ടീമിൽ അംഗമായിരുന്ന അഗാർക്കർ 2000ങ്ങളിൽ ടീം ഇന്ത്യയുടെ നിർണായക പേസർമാരിൽ ഒരാളായിരുന്നു. ടെസ്റ്റിൽ 58 ഉം, ഏകദിനത്തിൽ 288 ഉം, ടി20യിൽ മൂന്നും വിക്കറ്റാണ് സമ്പാദ്യം. ബിസിസിഐ മുഖ്യ സെലക്ടർ സ്ഥാനത്തേക്ക് രവി ശാസ്ത്രി, ദിലിപ് വെങ്സർകാർ തുടങ്ങിയ പേരുകളും പറഞ്ഞുകേൾക്കുന്നുണ്ട്.
