തിരുവനന്തപുരം: കേരള ചീഫ് സെക്രട്ടറിയായി ഡോ.വി വേണുവും സംസ്ഥാന പോലീസ് മേധാവിയായി ഷെയിഖ് ദർവേഷ് സാഹിബും ചുമതലയേറ്റു. ദർബാർ ഹാളിൽ നടന്ന ചടങ്ങിലാണ് ഡോ. വി വേണു ചീഫ് സെക്രട്ടറി ചുമതലയേറ്റത്. പോലീസ് ആസ്ഥാനത്ത് നടന്ന ചടങ്ങിൽ സ്ഥാനമൊഴിഞ്ഞ പോലീസ് മേധാവി അനിൽ കാന്ത് പുതിയ പോലീസ് മേധാവി എസ് ദർവേഷ് സാഹിബിന് അധികാരം കൈമാറി.
വിരമിക്കുന്ന ഡിജിപി അനിൽ കാന്തിന്റെ ഔദ്യോഗിക വിടവാങ്ങൽ ഉച്ചയ്ക്ക് 12-ന് പോലീസ് ആസ്ഥാനത്ത് നടന്നു. സംസ്ഥാന പോലീസ് മേധാവി അനിൽ കാന്ത് പോലീസ് ആസ്ഥാനത്തെ ധീരസ്മൃതിഭൂമിയിൽ പുഷ്പചക്രം അർപ്പിച്ചശേഷം പുതിയ പോലീസ് മേധാവി എസ് ദർവേഷ് സാഹിബിന് അധികാരം കൈമാറി. സ്ഥാനമൊഴിഞ്ഞ പോലീസ് മേധാവി അനിൽ കാന്തിനെ പുതിയ മേധാവിയും മുതിർന്ന പോലീസ് ഓഫിസർമാരും ചേർന്ന് യാത്രയയച്ചു.
ആന്ധപ്രദേശ് സ്വദേശിയാണ് ഷെയിഖ് ദർവേഷ് സാഹിബ്. 1990 ബാച്ചിലെ ഐപിഎസ് ഓഫീസറായ ദർവേഷ് ഫയർ ആന്റ് റെസ്ക്യൂ വിഭാഗം ഡയറക്ടർ ജനറലായിരുന്നു. കേരള കേഡറിൽ എഎസ്പിയായി നെടുമങ്ങാട് സർവീസ് ആരംഭിച്ചു. തുടർന്ന് വയനാട്, കാസർകോട്, കണ്ണൂർ, പാലക്കാട് എന്നിവിടങ്ങളിൽ എസ്പിയായും എംഎസ്പി, കെഎപി രണ്ടാം ബറ്റാലിയൻ എന്നിവിടങ്ങളിൽ കമാഡന്റായും സേവനമനുഷ്ഠിച്ചു.
ഡോ. വി വേണു കോഴിക്കോട് മെഡിക്കൽ കോളേജിൽ നിന്നും എംബിബിഎസ് പൂർത്തിയാക്കിയ ശേഷമാണ് സിവിൽ സർവീസിലെത്തുന്നത്. ആഭ്യന്തര സെക്രട്ടറി സ്ഥാനത്ത് നിന്നാണ് അദ്ദേഹം ചീഫ് സെക്രട്ടറി പദത്തിലേയ്ക്ക് എത്തുന്നത്. കണ്ണൂർ രാജ്യാന്തര വിമാനത്താവള കമ്പനിയുടെ മാനേജിങ് ഡയറക്ടർ, റവന്യൂ പ്രിൻസിപ്പൽ സെക്രട്ടറി, എക്സൈസ് കമ്മിഷണർ, ഭക്ഷ്യ സിവിൽ സപ്ലൈസ് സെക്രട്ടറി, കേന്ദ്ര സാംസ്കാരിക മന്ത്രാലയത്തിൽ ജോയിന്റ് സെക്രട്ടറി തുടങ്ങിയ വിവിധ പദവികൾ വഹിച്ചിട്ടുണ്ട്.
Comments