കോട്ടയം: ലോക്‌സഭ തിരഞ്ഞെടുപ്പിൽ കൂടുതൽ സീറ്റ് ഇടത് മുന്നണിയിൽ ആവശ്യപ്പെടാൻ ഒരുങ്ങി കേരള കോൺഗ്രസ് എം. കോട്ടയത്തിന് പുറമെ ഇടുക്കിയും പത്തനംതിട്ടയും ആവശ്യപ്പെട്ടേയ്‌ക്കും. ഇത് സംബന്ധിച്ച് സൂചന ഇടത് മുന്നണി നേതാക്കൾക്ക് നൽകിയതായി ജോസ് കെ മാണി കഴിഞ്ഞ ദിവസം കോട്ടയത്ത് നടന്ന സ്റ്റിയറിംഗ് കമ്മിറ്റി യോഗത്തെ അറിയിച്ചു. പത്തനംതിട്ട പാർലമെന്റ് മണ്ഡലത്തിൽ മൂന്ന് എംഎൽഎമാർ പാർട്ടിയ്‌ക്കുണ്ട്. ഇത് കണക്കിലെടുത്ത് പത്തനംതിട്ടയിൽ അവകാശവാദം കടുപ്പിക്കാൻ ഒരുങ്ങുകയാണ് കേരള കോൺഗ്രസ് എം.
കേരള കോൺഗ്രസ് എം മുന്നണിയിയേ്ക്ക് വന്നത് ഗുണം ചെയ്‌തെന്ന നിഗമനത്തിലാണ് സിപിഎം. ഇത് പരിഗണിച്ച് കൂടുതൽ സീറ്റ് പാർലമെന്റ് തിരഞ്ഞെടുപ്പിൽ തങ്ങൾക്ക് നൽകണമെന്നാണ് കേരള കോൺഗ്രസ് ആവശ്യപ്പെടുന്നത്. ഇടുക്കിയിലും കേരള കോൺഗ്രസിന് വലിയ സ്വാധീനമാണുള്ളത്. കഴിഞ്ഞ പ്രാവശ്യം ഇടത് സ്വതന്ത്രൻ ഒരു ലക്ഷത്തിലധികം വോട്ടുകൾക്കാണ് തോറ്റത്. അതിനാൽ ആ സീറ്റ് തങ്ങൾക്ക് നൽകുന്നതിൽ തെറ്റില്ല എന്നുമാണ് കേരള കോൺഗ്രസ് മുന്നോട്ടുവെയ്‌ക്കുന്ന വാദം.
അതേ സമയം സിപിഎം സംസ്ഥാന സെക്രട്ടറിയേറ്റ് എകെജി സെന്ററിൽ തുടരുകയാണ്. വിവാദ വിഷയങ്ങൾ ചർച്ച ചെയ്യേണ്ടെന്നാണ് തീരുമാനം. ലോക്‌സഭ തിരഞ്ഞെടുപ്പ് ഒരുക്കങ്ങൾ ചർച്ചയാകും.
