വാഷിംഗ്ടൺ: ഓഹരി വിപണിയിൽ റെക്കോർഡ് നേട്ടം സ്വന്തമാക്കി ആപ്പിൾ. വൻ നേട്ടത്തോടെയാണ് ആപ്പിൾ ഓഹരികൾ വ്യാപാരം അവസാനിപ്പിച്ചത്. ഇതോടെ ആപ്പിളിന്റെ വിപണി മൂല്യം മൂന്ന് ലക്ഷം കോടി ഡോളറായി ഉയർന്നു. ഈ നേട്ടം സ്വന്തമാക്കുന്ന ലോകത്തിലെ ഏക കമ്പനിയാണ് ആപ്പിൾ.
വെള്ളിയാഴ്ച രാവിലെ വ്യാപാര സെഷനിൽ ഓഹരിവില 1.3 ശതമാനം ഉയർന്ന് 191.99 ഡോളറിലെത്തിയതോടെയാണ് വിപണി മൂല്യം രണ്ടാം തവണയും ഉയർന്നത്. 2023-ൽ ഇതുവരെ ആപ്പിളിന്റെ ഓഹരിവില 46 ശതമാനമാണ് വർദ്ധിച്ചത്. ഐഫോൺ, ഐപാഡ്, ആപ്പിൾ വാച്ച്, ഐക്ലൗഡ്, ആപ്പിൾ മ്യൂസിക്, വിഷൻ പ്രോ , ആപ്പിൾ ടിവി പ്ലസ്, ഐട്യൂൺസ് എന്നിവയുടെ വിൽപനയിലൂടെയാണ് ആപ്പിൾ വരുമാനം ഉയർത്തുന്നത്. ഏപ്രിൽ-ജൂൺ പാദത്തിൽ ഐഫോൺ വിൽപന പ്രതീക്ഷിച്ചതിലും മുകളിലാണ്. വിപണിയിലവതരിപ്പിച്ച ഓഗ്മെന്റഡ് റിയാലിറ്റി ഹെഡ്സെറ്റായ വിഷൻ പ്രോയും മികച്ച സ്വീകാര്യതയാണ് നേടുന്നത്.
2021 ഓഗസ്റ്റിലാണ് ഇതിന് മുൻപ് ആപ്പിളിന്റെ മൂല്യം രണ്ട് ലക്ഷം കോടി ഡോളർ കടന്നത്. മാസങ്ങൾക്കിപ്പുറം തന്നെ മൂന്ന് ലക്ഷം കോടി ഡോളറിലേക്ക് മൂല്യമെത്തിയിരുന്നു. എന്നാൽ ഏതാനം മണിക്കൂറുകൾ മാത്രമാണ് ആ നേട്ടം നിലനിർത്താനായത്. ഓഹരിവില താഴ്ന്നതോടെ വിപണിമൂല്യവും താഴുകയായിരുന്നു.
