പ്രമുഖ ഇന്ത്യൻ വ്യവസായി മുകേഷ് അംബാനി തന്റെ കാർ ശേഖരത്തിലേക്ക് മറ്റൊരു ആഡംബര വാഹനം കൂടി ചേർത്തതായി റിപ്പോർട്ട്. അടുത്തിടെ തങ്ങളുടെ മൂന്നാമത്തെ റോൾഡ് റോയ്സ് കള്ളിനൻ ഡെലിവറി നടത്തി. നമ്പർ പ്ലേറ്റിനും വിലയിലും ഒരുപിടി മുന്നിലാണ് ഈ കാർ. മെഴ്സിഡസ്-എഎംജി ജി-വാഗൻ, എംജി ഗ്ലോസ്റ്റർ എന്നിവയുൾപ്പെടെയുള്ള പതിവ് സുരക്ഷാ വാഹനങ്ങളുടെ അകമ്പടിയോടെയാണ് പുതിയ കാർ എത്തിയത്.
6.8 കോടി രൂപ അടിസ്ഥാന വിലയുള്ള കാർ, അംബാനി സ്വന്തമാക്കിയത് 13.14 കോടി രൂപയ്ക്കാണ്. അധിക ഓപ്ഷണൽ ഫീച്ചറുകളും കസ്റ്റമൈസേഷനുകളും മൊത്തത്തിലുള്ള ചെലവ് ഉയർത്തുന്നത്. പുതിയ കള്ളിനൻ സ്പോർട്സ് ടസ്കൻ സൺ കളർ ഷെയ്ഡിലാണ്. പെയിന്റ് സ്കീമിന് മാത്രം ഒരു കോടിയോളം രൂപ ചെലവ് വരുമെന്നാണ് റിപ്പോർട്ടുകൾ വ്യക്തമാക്കുന്നത്. കാറിൽ ഓപ്ഷണല് 21 ഇഞ്ച് വീലുകളും സജ്ജീകരിച്ചിട്ടുണ്ട്.
‘0001’ -ആണ് രജിസ്ട്രേഷൻ നമ്പർ. ഈ നമ്പറിനായി മാത്രം കുടുംബം 12 ലക്ഷം രൂപ ആണ് ചെലവാക്കിയത്. പുതിയ സീരീസിൽ നിന്ന് ഒരു നമ്പർ തിരഞ്ഞെടുത്തിരിക്കുകയാണ് അംബാനി. നിലവിലെ സീരീസിൽ നിന്നുള്ള എല്ലാ നമ്പറുകളും ഇതിനകം എടുത്തതിനാലാണ് ഇത്. രജിസ്ട്രേഷന് 2037 ജനുവരി വരെ സാധ്യതയുണ്ട്.
2018-ലാണ് റോൾസ് റോയ്സിന്റെ ആദ്യ എസ്യുവി കള്ളിനൻ ഇന്ത്യയിലെത്തുന്നത്. ദക്ഷിണാഫ്രിക്കൻ ഖനിയിൽ നിന്ന് കുഴിച്ചെടുത്ത 3106 കാരറ്റ് വജ്രമായ കള്ളിനൻ ഡയമണ്ടിൽ നിന്നാണ് ഇതിന് റോൾസ് റോയിസ് എന്ന പേര് വന്നത്. റോൾസ് റോയ്സ് ഫാന്റത്തിൽ നിന്ന് പ്രചോദനം ഉൾക്കൊണ്ടാണ് കള്ളിനന്റെ ഡിസൈൻ. ഫാന്റത്തിലെ വലിയ ഗ്രിൽ കള്ളിനനിലുമുണ്ട്. ആറടി പൊക്കമാണ് കള്ളിനനുള്ളത്. പുരതാന റോൾസ് റോയിസുകളെ അനുസ്മരിപ്പിക്കുന്ന ഡി ബാക്ക് ശൈലിയിലാണ് പിൻഭാഗം.
ഇന്റീരിയറിലാണ് ആഡംബരം പ്രകടമാകുന്നത്. മുൻ സീറ്റുകളിലും ഡാഷ് ബോർഡിലുമായി 12 ഇഞ്ച് ഇൻഫോടെയ്മെന്റ് സ്ക്രീനുകൾ, ബ്ലൂറേ ഡിസ്പ്ലേ ടിവി, പത്ത് സ്പീക്കറുകൾ, ലതർ ഫിനീഷ്ഡ് ഇന്റീരിയർ തുടങ്ങിയവയൊക്കെ ഇതിന്റെ പ്രത്യേകതകളാണ്.
Comments