വിട്ടുമാറാത്ത തലവേദനയുണ്ടോ? പരിഹാരം യോഗയിലുണ്ട്

ഇന്ന് സാധാരണയായി പ്രായഭേദമന്യേ നേരിടുന്ന ബുദ്ധിമുട്ടാണ് തലവേദന അല്ലെങ്കിൽ മൈഗ്രേയ്ൻ. കൗമാരപ്രായക്കാർ ഉൾപ്പെടെ ഇന്ന് മൈഗ്രേയ്‌ന് ഇരയാണ്. ജീവിതശൈലിയിൽ ഉണ്ടാകുന്ന മാറ്റം, മാനസിക സമ്മർദ്ദം, പോഷകാഹാരക്കുറവ്, ഉറക്കക്കുറവ്, വ്യായാമക്കുറവ് തുടങ്ങിയവയെല്ലാം ഒരുപരിധി വരെ ഈ അവസ്ഥയ്‌ക്ക് കാരണമാണ്. മരുന്നിന് പിന്നാലെ പായുന്നതിന് മുൻപ് ഇതിന് യോഗയിൽ പരിഹാരമുണ്ട്.

ഒരു യോഗാദ്ധ്യാപകന്റെ മേൽനോട്ടത്തിൽ യോഗ പരിശീലിക്കുന്നതോടെ ജീവിതശൈലിയിലും ആരോഗ്യകരമായ മാറ്റങ്ങൾ വരുത്തുന്നതിലൂടെയും വളരെയധികം വ്യത്യാസം പ്രകടമാകാറുണ്ട്. ഇതിനായി ഈ യോഗാസനങ്ങൾ ശീലിമാക്കുന്നത് ഗുണം ചെയ്യും.

പാദഹസ്താസന:-

മാറ്റിൽ നിവർന്ന് നിന്ന ശേഷം പാദങ്ങൾ മാറ്റിൽ ഉറപ്പിച്ച്, രണ്ട് കൈകൾ മുകളിലേക്ക് ഉയർത്ത് നന്നായി സ്‌ട്രെച്ച് ചെയ്ത ശേഷം കൈപ്പത്തികൾ നിലത്ത് തൊടുന്നതിനായി മുന്നോട്ട് കുനിയുക. സമയമെടുത്ത് സാവാധാനത്തിൽ വേണം കുനിയേണ്ടത്. കാലുകളുടെ പിൻവശത്തും പുറംഭാഗത്തും സ്‌ട്രെച്ച് അനുഭവപ്പെടുന്ന രീതിയിലാണ് കുനിയേണ്ടത്.

കഴുത്ത് അയവ് വരുത്തി തലഭാഗം തൂക്കി ഇടുന്ന രീതിയിൽ വെയ്‌ക്കണം. ഇത് തലയിലേക്കുള്ള രക്തയോട്ടം കൂട്ടാൻ സഹായിക്കുന്നു. 10 മുതൽ 30 സെക്കൻഡ് വരെ ഇതേ അവസ്ഥയിൽ തുടരാവുന്നതാണ്.

സേതുബന്ധാസന:-

മാറ്റിൽ കിടന്ന ശേഷം കാലുമുട്ടുകൾ മടക്കി കാൽപാദം മാറ്റിൽ ശരീരത്തോട് ചേർത്ത് വെയ്‌ക്കുക. കാൽപാദം മാറ്റിൽ ഉറപ്പിച്ച ശേഷം രണ്ട് കൈകൾ കൊണ്ടും കണങ്കലിൽ പിടിക്കുക. അതിന് ശേഷം ശ്വാസം ഉള്ളിലേക്ക് എടുത്തുകൊണ്ട് ഇടുപ്പ് ഉയർത്തുക. അഞ്ച് മുതൽ 10 സെക്കന്റഡ് വരെ ഈ അവസ്ഥയിൽ തുടരാവുന്നതാണ്. അതിന് ശേഷം ശ്വാസം വിട്ടുകൊണ്ട് പൂർവ്വസ്ഥിതിയിലേക്ക് വരാവുന്നതാണ്. സേതുബന്ധാസനം പതിവായി ശീലിക്കുന്നത് വഴി രക്തസമ്മർദ്ദം നിയന്ത്രണത്തിലാക്കാനും തലച്ചോറിലേക്കുള്ള രക്തയോട്ടം വർദ്ധിപ്പിക്കാനും സാധിക്കുന്നു. ഇതിലൂടെ മാനസിക-ശാരീരിക സമ്മർദ്ദം കുറയ്‌ക്കാനാകും.

പർവ്വാസന:-

ഈ യോഗാസനം പതിവായി പരശീലിക്കുന്നതിലൂടെ തലച്ചോറിലേക്കുള്ള രക്തയോട്ടം വർദ്ധിപ്പിക്കാനും അതിലൂടെ തലവേദനയ്‌ക്ക് ഒരു പരിധി വരെ ആശ്വാസത്തിനും കാരണമാകുന്നു.നല്ല ഉറക്കം ലഭിക്കുന്നതിനും പർവ്വാസനം സഹായിക്കുന്നു.

പ്രാണായാമം:-

നാഡീവ്യവസ്ഥയെ ശുദ്ധീകരിക്കാൻ ഏറെ സഹായകരമാണ് പ്രാണായാമം. കൂടാതെ ഏകാഗ്രത, ഓർമ്മശക്തി, മാനസികാരോഗ്യം എന്നിവ കൂട്ടാനും സഹായിക്കുന്നു. ശരീരത്തിലെ ഓക്‌സിജന്റെ അളവ് കൂടുന്നത് തലവേദനയ്‌ക്ക് ആശ്വാസം നൽകുന്നു.

ശവാസനം:-

തിരക്കുപിടിച്ച ജീവിതത്തിനിടയിൽ ശരിയായ ശരീര വിശ്രമം ആവശ്യമാണ്. മാനസിക-ശാരീരിക സമ്മർദ്ദം കുറയ്‌ക്കാനും ശരീരത്തെ കൂടുതൽ ഊർജ്ജസ്വലമാക്കാനും ഏറെ പ്രയോജനകരമാണ് ശവാസനം. മാനസിക സമ്മർദ്ദം മൂലം തലവേദന, ഉത്കണ്ഠ, വിഷാദം എന്നീ അവസ്ഥകളിലൂടെ കടന്നുപോകുന്നവർക്കും സഹായകരമാണ്.

മൈഗ്രേയ്ൻ അനുഭവിക്കുന്നവർക്ക് ഡോക്ടറുടെ നിർദ്ദേശപ്രകാരം ചികിത്സാരീതികൾ തുടരുന്നതിനൊപ്പം വിദഗ്ധനായ യോഗാപരിശീലകന്റെ സാന്നിദ്ധ്യത്തിൽ പരിശീലനം നേടാവുന്നതാണ്.