കേരള ബ്ലാസ്റ്റേഴ്സ് എഫ് സിയുടെ യുവമലയാളി താരം വിബിൻ മോഹനൻ വിദഗ്ധ പരിശീലനത്തിനായി നിലവിൽ ഗ്രീക്ക് ക്ലബ്ബായ ഒ എഫ് ഐ ക്രെറ്റെ എഫ് സി ഒപ്പമാണുളളത്. മറ്റൊരു മലയാളി താരത്തിനും ലഭിക്കാത്ത അവസരമാണ് തൃശൂർ സ്വദേശിയായ 20-കാരൻ വിബിൻ മോഹനന് ലഭിച്ചത്. സെൻട്രൽ മിഡ്ഫീൽഡറായ വിബിൻ മോഹനൻ കേരള ബ്ലാസ്റ്റേഴ്സ് എഫ് സിയുടെ സീനിയർ ടീമിനായി 11 മത്സരങ്ങൾ കളിച്ച്, ഒരു ഗോളും സ്വന്തം പേരിൽ ചേർത്തിട്ടുണ്ട്. ഗ്രീക്ക് ക്ലബ്ബായ ഒ എഫ് ഐ ക്രെറ്റെ എഫ് സി ഒപ്പം പരിശീലനം നടത്തുന്ന വിപിൻ മോഹനന്റെ ചിത്രങ്ങളാണിപ്പോൾ കേരളാ ബ്ലാസ്റ്റേഴ്സ് പങ്കുവച്ചിരിക്കുന്നത്.
2023-2024 പ്രീ സീസണിൽ എല്ലാ സൗകര്യങ്ങളോടെയും പരിശീലനം നടത്തുന്ന വിബിൻ മോഹനൻ ഒ എഫ് ഐ ക്രെറ്റെയിൽ ഒരു മാസത്തെ പരിശീലനമാണ് നടത്തുക. ജൂലൈ 14 വരെയാണ് ഗ്രീസിൽ വിബിൻ മോഹനൻ ഒ എഫ് ഐ ക്രെറ്റെ എഫ് സിക്ക് ഒപ്പമുണ്ടാകുക. തുടർന്ന് താരം ഒ എഫ് ഐ ക്രെറ്റെ എഫ് സിയുടെ നെതർലൻഡ്സ് പര്യടനത്തിന്റെയും ഭാഗമാകും. ജൂലൈ 15 മുതൽ 30 വരെ ആണ് ഒ എഫ് ഐ ക്രെറ്റെ എഫ് സിക്ക് ഒപ്പം വിബിൻ മോഹനൻ നെതർലൻഡ്സ് പര്യടനം നടത്തുക. ഡച്ച് ഫസ്റ്റ് ഡിവിഷൻ ക്ലബ്ബുകളായ എസ് സി ഹീരെവീൻ, എഫ് സി എൻ എ സി ബ്രെഡ, എഫ് സി അട്രാക്ക് എന്നീ ടീമുകളുമായിട്ടായിരിക്കും ഒ എഫ് ഐ ക്രെറ്റെ എഫ് സി യുടെ പരിശീലന മത്സരങ്ങൾ അരങ്ങേറുക.
വിബിൻ മോഹനന് പൂർണ പിന്തുണയുമായി കേരള ബ്ലാസ്റ്റേഴ്സ് രംഗത്തുണ്ട്. 2017-ലാണ് വിബിൻ മോഹനൻ കേരള ബ്ലാസ്റ്റേഴ്സ് എഫ് സിയുടെ യൂത്ത് ക്യാമ്പിൽ എത്തിയത്. 2023 ജനുവരി എട്ടിന് മുംബൈ സിറ്റി എഫ് സിക്ക് എതിരേ ആയിരുന്നു ഐ എസ് എല്ലിൽ കേരള ബ്ലാസ്റ്റേഴ്സ് എഫ് സി ജേഴ്സിയിൽ വിബിൻ മോഹനൻ അരങ്ങേറ്റം കുറിച്ചത്.
Comments