ആരാധകരെ കൈയ്യിലെടുക്കാൻ ദുൽഖർ സൽമാൻ പങ്കുവെച്ച വീഡിയോയുടെ സത്യാവസ്ഥ പുറത്തായതോടെ വിമർശനങ്ങൾ ഏറ്റുവാങ്ങുകയാണ് താരം. പുതിയ സ്മാർട്ട് ഫോണിന്റെ പരസ്യ ചിത്രത്തിന് വേണ്ടി ചിത്രീകരിച്ച വീഡിയോയാണ് ദുൽഖർ പങ്കുവെച്ചതെന്ന് താരം തന്നെ വ്യക്തമാക്കുകയാണ്.
സാമൂഹ്യമാദ്ധ്യമങ്ങളിൽ പ്രചരിച്ച ദുൽഖറിന്റ വീഡിയോ ആരാധകരെ ഒന്നടങ്കം ആശങ്കയിലാക്കിയിരുന്നു. ദുൽഖർ വികാരനിർഭരമായി സംസാരിക്കുന്നതാണ് വീഡിയോ. ദൃശ്യങ്ങൾ പ്രചരിച്ച ശേഷം നിരവധി പേരാണ് ചോദ്യങ്ങളുമായി രംഗത്തെത്തിയത്. എന്നാൽ വീഡിയോയുടെ നിജസ്ഥിതിയാണ് താരം പുറത്തുവിട്ടിരിക്കുന്നത്.
മൊബൈൽ പരസ്യത്തിന്റെ പ്രമോഷൻ വീഡിയോയിരുന്നു അത് എന്നാണ് ദുൽഖർ തന്റെ പുതിയ പോസ്റ്റിലൂടെ ആരാധകരെ അറിയിച്ചിരിക്കുന്നത്. ‘ആദ്യമായി ഞാൻ ഇത്തരം ഒരു അവസ്ഥയിലൂടെ കടന്നുപോകുകയാണ്. കാര്യങ്ങളൊന്നും പഴയതുപോലെയല്ല. മനസ്സിൽ നിന്ന് കളയാൻ പറ്റാത്ത അവസ്ഥയിലേക്ക് അത് എത്തിയിരിക്കുന്നു. എനിക്ക് കൂടുതൽ പറയണമെന്നുണ്ട്. പക്ഷേ എന്നെ അതിന് അനുവദിക്കുന്നില്ല’ എന്നാണ് ദുൽഖർ വീഡിയോയിൽ പറയുന്നത്. വീഡിയോ പോസ്റ്റ് ചെയ്തതിന് ശേഷം പെട്ടെന്ന് അത് നീക്കം ചെയ്തു. എന്നാൽ ആരാധകർ അത് പ്രചരിപ്പിക്കുകയായിരുന്നു.
ഏതെങ്കിലും പരസ്യത്തിന്റെ വീഡിയോ ആണോ എന്നും പുതിയ സിനിമയുടെ പ്രമോഷനാണോ എന്നും നിരവധി ആരാധകർ സംശയം പ്രകടിപ്പിച്ചിരുന്നു. ആരാധകരുടെ ചോദ്യങ്ങൾക്ക് മറുപടിയായാണ് താരം വീഡിയോയുടെ സത്യാവസ്ഥ വ്യക്തമാക്കിയിരിക്കുന്നത്. എന്നാൽ താരം നിരാശയിലാണെന്ന തരത്തിൽ വീഡിയോ പങ്കുവച്ച് ആരാധകരെ കബളിപ്പിച്ചതിൽ വലിയ വിമർശനവും ഉയരുന്നുണ്ട്. പരസ്യ ചിത്രത്തിന്റെ ഷൂട്ടിന് വേണ്ടി പകർത്തിയ ദൃശ്യങ്ങൾ സ്വന്തം ജീവിതത്തിലേതാണെന്ന തരത്തിൽ പോസ്റ്റ് ചെയ്തത് ആരാധകരുടെ ഇഷ്ടത്തെ ചൂഷണം ചെയ്തതാണെന്നാണ് വിമർശനം.
Comments