കുട്ടികൾ പരുഷമായി പെരുമാറിത്തുടങ്ങിയാൽ അത് മാതാപിതാക്കൾക്ക് വലിയ ബുദ്ധിമുട്ട് സൃഷ്ടിക്കാറുണ്ട്. സൽസ്വഭാവമുള്ള മക്കളെ വളർത്തിയെടുക്കാനും പെരുമാറ്റ വൈകല്യങ്ങൾ തടയാനും
മാതാപിതാക്കൾ ചെയ്യേണ്ട കാര്യങ്ങൾ എന്തൊക്കെയാണെന്ന് നോക്കാം. മാനസികരോഗ വിദഗ്ധയായ ജാസ്മിൻ മക്കോയുടെ പഠനം ഇങ്ങനെ..
കാരണം കണ്ടെത്തുക
മിക്കപ്പോഴും കുട്ടി പരുഷമായി പെരുമാറാൻ തുടങ്ങുന്നതിന് അവരുടേതായ കാരണങ്ങളുണ്ട്. ചിലപ്പോഴൊക്കെ അവരുടെ മനസ്സിലുള്ള വികാരങ്ങൾ ആശയ വിനിമയം നടത്താൻ കഴിയാത്തതായിരിക്കും പ്രശ്നം. അത്തരം സന്ദർഭങ്ങളിൽ മാതാപിതാക്കൾ കൂടുതൽ ആഴത്തിൽ കുട്ടികളോട് കാര്യം അന്വേഷിക്കുകയും അവർ എന്താണ് ആശയവിനിമയം നടത്താൻ ശ്രമിക്കുന്നതെന്ന് മനസ്സിലാക്കാൻ ശ്രമിക്കുകയും വേണം.
വാക്കുകൾ പഠിപ്പിക്കുക
പരുഷമായി പെരുമാറുന്നതിന് പകരം അത്തരം സാഹചര്യങ്ങളിൽ മറ്റേതെല്ലാം രീതിയിൽ പെരുമാറാം എന്ന് പറഞ്ഞ് മനസ്സിലാക്കുക. ദേഷ്യം വരുമ്പോൾ ഉപയോഗിക്കേണ്ടുന്ന വാക്കുകൾ പറഞ്ഞുകൊടുക്കുക. ഇതിലൂടെ വികാരങ്ങൾ നന്നായി പ്രകടിപ്പിക്കാനും അവരെ മികവുറ്റവരാക്കാനും സഹായിക്കും. ദയയും വിനയവും കാണിക്കേണ്ടതിന്റെ പ്രാധാന്യവും കുട്ടികളെ മനസ്സിലാക്കിക്കുക.
സീൻ റീ-ക്രിയേറ്റ് ചെയ്യുക
നേരത്തെ ഉപയോഗിച്ച മോശം വാക്കുകൾക്ക് പകരം നല്ല വാക്കുകളും പ്രവൃത്തികളും പ്രയോഗിക്കാൻ പഠിപ്പിച്ച് കുട്ടികൾ പരുഷമായി പെരുമാറിയ നിമിഷം റീക്രിയേറ്റ് ചെയ്യുക. ഇതിലൂടെ അവർക്ക് വികാരങ്ങൾ പ്രകടിപ്പിക്കാനും മികച്ച രീതിയിൽ ആശയവിനിമയം നടത്താൻ സഹായിക്കാനും കഴിയുന്നതാണ്. ഇത് കുട്ടികൾക്ക് കൂടുതൽ ആത്മവിശ്വാസവും നൽകും.
പ്രോത്സാഹിപ്പിക്കുകയും പ്രശംസിക്കുകയും ചെയ്യുക
എങ്ങനെ നന്നായി ആശയവിനിമയം നടത്താമെന്ന് പഠിക്കുന്നതിനിടയിൽ കുട്ടികളുടെ പ്രവർത്തനങ്ങളെയും പരിശ്രമങ്ങളെയും അഭിനന്ദിക്കുക. പ്രശംസിക്കുന്നതിലൂടെ കുട്ടികൾക്ക് തെറ്റ് തിരുത്താനാകും. കുട്ടികൽ ദേഷ്യപ്പെടുമ്പോഴും പ്രകോപിതരാകുമ്പോഴും കൂടുതൽ ദയയും അനുകമ്പയും ഉള്ളവരായിരിക്കുക. ഇത് അവരെ നല്ലമനോഭാവമുള്ളവരാക്കാൻ കൂടുതൽ പ്രോത്സാഹിപ്പിക്കും. ഇക്കാര്യങ്ങൾ ശ്രദ്ധിച്ചാൽ കുട്ടികളിലെ പരുഷമായ സ്വഭാവങ്ങൾ മാറ്റാൻ സാധിക്കും.
