അവധികളൊന്നും ഇല്ലാതെ ജോലി ചെയ്യാൻ നിങ്ങൾക്ക് സാധിക്കുമോ? അങ്ങനെയുള്ള ജോലികൾ വിരസത നിറഞ്ഞതാവുമ്പോൾ ഒരു അവധിയെടുത്ത് യാത്ര പോവാൻ ഇഷ്ടപ്പെടാത്തവരായി ആരുമുണ്ടാവുകയില്ല. എന്നാൽ നിങ്ങളുടെ സ്ഥാപനം തന്നെ അതിനുള്ള അവസരം തന്നാലോ? അതിൽപ്പരം ഭാഗ്യം വേറെ എന്താണ് വേണ്ടത് അല്ലേ ? അത്തരത്തിൽ ജീവനക്കാർക്ക് വിശ്രമിക്കുവാനും റീചാർജ് ചെയ്യുവാനും ഒന്നല്ല, രണ്ടല്ല, ഒമ്പത് ദിവസത്തെ അവധിയാണ് യുഎസ് ആസ്ഥാനമായി പ്രവർത്തിക്കുന്ന ഒരു സോഫ്റ്റ്വെയർ കമ്പനി നൽകിയിരിക്കുന്നത്. ഈ നീക്കത്തെ പ്രശംസിച്ചുകൊണ്ട് ഇപ്പോൾ നെറ്റിസണും രംഗത്തെത്തിയിരിക്കുകയാണ്.
കാലിഫോർണിയയിൽ പ്രവർത്തിക്കുന്ന ഹാക്കർറാങ്ക് എന്ന കമ്പനിയാണ് ജീവനക്കാർക്ക് ജൂലൈ 1 മുതൽ 9 വരെ ശമ്പളത്തോടുകൂടിയ അവധി പ്രഖ്യാപിച്ചിരിച്ചുന്നത്. ഈ സന്തേഷവാർത്ത കമ്പനി ജിവനക്കാരനായ ശൈലേന്ദ്ര പാണ്ഡെ അദ്ദേഹത്തിന്റെ ലിങ്ക്ഡിൻ പോസ്റ്റ് വഴി പങ്കിട്ടിരുന്നു.
കഠിനജോലി ഭാരങ്ങൾ പലപ്പോഴും ജീവനക്കാരെ വീർപ്പ്മുട്ടിക്കുകയും അവധി എടുക്കാൻ പ്രേരിപ്പിക്കുകയും ചെയ്യുന്നു. ജീവനക്കാരുടെ ബുദ്ധിമുട്ടുകൾ മനസിലാക്കി ഇത്രയും നീണ്ട ശമ്പളത്തോടുകൂടിയ അവധി തന്ന കമ്പനിയ്ക്ക് അഭിനന്ദനപ്രവാഹങ്ങളോടെയാണ് പാണ്ഡെ തന്റെ പോസ്റ്റ് പങ്കുവച്ചത്. കൂട്ട പിരിച്ചുവിടലുകളുടെയും വിപണി അസ്ഥിരതയുടെയും കാലത്താണ് തങ്ങളുടെ ജീവനക്കാർക്ക് ശമ്പളത്തോട് കൂടിയുള്ള അവധി വേണ്ടുവോളം നൽകാൻ ഒരു കമ്പനി തയ്യാറാകുന്നത്..
