തമിഴ് സിനിമാസ്വാദകർ ഏറെ പ്രതീക്ഷയോടെ കാത്തിരിക്കുന്ന ചിത്രമാണ് ജയിലർ. അതിനാൽ സിനിമയുമായി ബന്ധപ്പെട്ട് വരുന്ന അപ്ഡേറ്റുകൾ എല്ലാം പ്രേക്ഷകർ ഏറെ ആവേശത്തോടെയാണ് സ്വീകരിക്കുന്നത്. ചിത്രത്തിലെ ഗാനമെത്തിയതാണ് ഇപ്പോൾ സമൂഹമാദ്ധ്യമത്തിലെ ചർച്ചാ വിഷയം. ‘കാവാലയ്യാ’ എന്ന് തുടങ്ങുന്ന ജയിലറിലെ ഗാനം ആരാധകർ ഏറ്റെടുത്തു കഴിഞ്ഞു. തമന്ന ഭാട്ടിയയാണ് രജനികാന്തിനൊപ്പം കാവാല എന്ന ഗാനത്തിൽ അഭിനയിച്ചിരിക്കുന്നത്.
ഗാനത്തിലെ തമന്നയുടെ വർണ്ണാഭമായ വസ്ത്രങ്ങളും ചുരുണ്ട മുടിയും മരുഭൂമി പ്രമേയമായ സെറ്റിലുള്ള നൃത്തവും ആരേയും ആകർഷിക്കുന്നതാണ്. ഗാനം ഇതുവരെ 20 ദശലക്ഷം വ്യൂസും നേടി. ‘കാവാലയ്യാ’ എന്ന് തുടങ്ങുന്ന ജയിലറിലെ ഗാനത്തിലെ ചില ഭാഗങ്ങൾ ലോകകപ്പ് ഗാനമായ ‘വക്ക വക്ക’യുടെ ദൃശ്യങ്ങളുമായി ബന്ധമുണ്ടെന്നാണ് സോഷ്യൽ മീഡിയ പറയുന്നത്.
‘തമന്നയുടെ വക്ക വക്ക കണ്ടോ ഗയ്സ്’ എന്ന അടിക്കുറിപ്പുകളോടെയാണ് ഗാനം ട്രോളുകളിൽ ഇടംപിടിച്ചിരിക്കുന്നത്. ഷക്കീറയുടെ ഗാനത്തിന്റെ രംഗങ്ങളും തമന്നയുടെ ഗാനരരംഗങ്ങളും ചേർത്തുവെച്ചുകൊണ്ടാണ് ട്രോളുകളിൽ താരതമ്യം ചെയ്യുന്നത്. 2010ലെ ലോകകപ്പ് ഫുട്ബോള് ഗാനമായിരുന്നു ‘വക്ക വക്ക’. പ്രശസ്ത ഗായിക ഷക്കീറയാണ് ഗാനം ആലപിച്ചത്.
എന്നാൽ ഇപ്പോഴിതാ ഷക്കീറയുമായി താരതമ്യപ്പെടുത്തിയ സംഭവത്തിൽ പ്രതികരിച്ചിരിക്കുകയാണ് തമന്ന. വക്ക വക്ക ഗാനത്തെ കാവാലയ്യാ ഗാനവുമായി കോർത്തിണക്കിയ ആരാധകരുടെ എഡിറ്റഡ് വീഡിയോയെ നടി പ്രശംസിച്ചു. ”വീഡിയോയുടെ sync വളരെ മികച്ചതാണ്.. അത് സമ്മതിച്ചേ പറ്റൂ.. ” (Have to admit the sync is pretty good ) എന്നതായിരുന്നു നടിയുടെ പ്രതികരണം.
ചിരഞ്ജീവി നായകനാകുന്ന ഭോലാ ശങ്കറാണ് തമന്നയുടെ അടുത്ത ചിത്രം. മെഹർ രമേഷ് സംവിധാനം ചെയ്യുന്ന ചിത്രത്തിൽ കീർത്തി സുരേഷും അഭിനയിക്കുന്നുണ്ട്. അനിൽ സുങ്കരയുടെ എകെ എന്റർടെയ്ൻമെന്റ്സ് നിർമ്മിക്കുന്ന ചിത്രത്തിൽ നായികയായി തമന്നയും ചിരഞ്ജീവിയുടെ സഹോദരിയായി കീർത്തി സുരേഷുമാണ് എത്തുന്നത്. ചിത്രം ഓഗസ്റ്റ് 11ന് തിയേറ്ററുകളിൽ എത്താൻ ഒരുങ്ങുകയാണ്.
