കണ്ണൂർ: കേരളാ ബ്ലാസ്റ്റേഴ്സിന്റെ മലയാളി താരം സഹൽ അബ്ദുൽ സമദ് വിവാഹിതനായി. ബാഡ്മിൻറൺ താരമായ റെസ ഫർഹത്താണ് താരത്തിന്റെ വധു. ടീമംഗങ്ങളും ആരാധകരും പങ്കുവച്ച ചിത്രങ്ങൾക്ക് പിന്നാലെയാണ് ഇന്ത്യൻ താരത്തിന്റെ വിവാഹ വിവരം പുറത്തുവന്നത്. സഹാതരങ്ങളായ കെ.പി രാഹുൽ, സച്ചിൻ സുരേഷ്, മുൻ താരങ്ങളായ സി.കെ വിനീത്, മുഹമ്മദ് റാഫി, റിനോ ആന്റോ എന്നിവരും ബ്ലാസ്റ്റേഴ്സിലെ സപ്പോർട്ട് സ്റ്റാഫുകളും ചടങ്ങിനെത്തിയിരുന്നു.
ക്ലബ്ബിലെയും ഇന്ത്യൻ ടീമിലെയും സഹതാരങ്ങൾക്കും സപ്പോർട്ട് സ്റ്റാഫിനുമായി സഹൽ പ്രത്യേകം വിവാഹസൽക്കാരം നടത്തുമെന്നാണ് സൂചന.ഇന്ത്യയുടെ സാഫ് കപ്പ് വിജയത്തിൽ നിർണായക പങ്കുവഹിച്ചതിന് പിന്നാലെയാണ് സഹലിന് വിവാഹ മധുരവുമെത്തിയത്.
ഇന്ത്യൻ ടീമിനു വേണ്ടി സഹൽ 30 മത്സരങ്ങളിൽ നിന്നാണ് മൂന്ന് ഗോളുകൾ നേടിയിട്ടുണ്ട്. ഐഎസ്എല്ലിൽ ബ്ലാസ്റ്റേഴ്സിനു വേണ്ടി പത്ത് ഗോളുകളും ഒമ്പത് അസിസ്റ്റുകളുമാണ് സഹലിന്റെ നേട്ടം.
