വർഷങ്ങൾക്കിപ്പുറം സുരേഷ് ഗോപിയും ബിജു മേനോനും ഒന്നിക്കുന്ന ചിത്രമാണ് ഗരുഡൻ. ചിത്രത്തിന്റെ പുതിയ അപ്‌ഡേറ്റുകളെല്ലാം തന്നെ ഇരുകയ്യും നീട്ടിയാണ് ആരാധകർ സ്വീകരിക്കുന്നത്. ഇപ്പോഴിതാ ഗരുഡന്റെ ഷൂട്ടിംഗ് റീൽസ് പുറത്ത് വിട്ടിരിക്കുകയാണ് ചിത്രത്തിന്റെ അണിയറപ്രവർത്തകർ. ചിത്രത്തിൽ അണിനിരക്കുന്ന പ്രധാന താരങ്ങളെയെല്ലാം ഉൾപ്പെടുത്തിയുള്ള റീൽസാണ് പുറത്ത് വിട്ടിരിക്കുന്നത്. സുരേഷ് ഗോപിയ്‌ക്കും ബിജു മേനോനും ഒപ്പം പ്രധാന വേഷത്തിൽ എത്തുന്നത് സിദ്ദിഖ്, ജഗദീഷ്, സംവിധായകൻ മേജർ രവി എന്നിവരാണ്.സിനിമയുടെ സംവിധായകനായ അരുൺ വർമ്മയെയും നിർമ്മാതാവ് ലിസ്റ്റിൻ സ്റ്റീഫനെയും പുറത്തു വന്ന വീഡിയോയിൽ കാണാം. കൊച്ചിയിൽ ഷൂട്ടിംഗ് പുരോഗമിച്ചുകൊണ്ടിരിക്കുന്ന ചിത്രം മാജിക് ഫ്രെയിംസാണ് തിയറ്ററുകളിലെത്തിക്കുന്നത്.
ക്രിസ്ത്യൻ ബ്രദേഴ്‌സ്, ചിന്താമണി കൊലക്കേസ്, പ്രണയ വർണ്ണങ്ങൾ, എഫ്‌ഐആർ, ഹൈവേ, പത്രം, മഹാത്മ എന്നിങ്ങനെ സുരേഷ് ഗോപി- ബിജുമേനോൻ കൂട്ടുക്കെട്ട് ഒന്നിച്ച സിനിമകളെല്ലാം പ്രേക്ഷക പ്രീതി പിടിച്ചുപ്പറ്റിയിരുന്നു. നീണ്ട പതിമൂന്ന് വർഷങ്ങൾക്ക് ശേഷമാണ് ഇരുവരുടെയും കൂട്ടായ്മയിൽ മറ്റൊരു ചിത്രം കൂടി പ്രേക്ഷകർക്ക് മുന്നിലേക്ക് എത്തുന്നത്.
നവാഗതനായ അരുൺ വർമ്മയുടെ സംവിധാനത്തിലാണ് ചിത്രം ഒരുങ്ങുന്നത്. കൊച്ചിയിൽ ചിത്രീകരണം ആരംഭിച്ച ഗരുഡനിൽ ആദ്യം ഭാഗമാകുന്നത് സുരേഷ് ഗോപിയാണ്. ജിസ് ജോയിയുടെ ചിത്രം പൂർത്തിയാക്കിയ ശേഷമാണ് ഗരുഡനിൽ ബിജുമേനോൻ ജോയിൻ ചെയ്തത്. കൊച്ചി പോർട്ട് ട്രസ്റ്റ് ഓഫീസിൽ നടന്ന ചിത്രീകരണത്തിലായിരുന്നു ഇരുവരും ഒന്നിച്ച് അഭിനയിച്ച് തുടങ്ങുന്നത്. സിനിമയിലെ തന്നെ ഏറ്റവും വലിയ രംഗമായിരുന്നു ഇവിടെ ഷൂട്ട് ചെയ്തത്. എസ് പി ഹരീഷ് മാധവ് എന്ന കഥാപാത്രത്തെയാണ് സുരേഷ് ഗോപി ചിത്രത്തിൽ അവതരിപ്പിക്കുന്നത്. ബിജു മോനോൻ അവതരിപ്പിക്കുന്നത് കൊമേഴ്‌സ് വിഭാഗം മേധാവി പ്രൊഫസർ നിഷാന്ത് എന്ന കഥാപാത്രത്തെയാണ്. ലീഗൽ ത്രില്ലർ ചിത്രമായ ഗരുഡനിൽ പോലീസ് ഉദ്യോഗസ്ഥനും അദ്ധ്യാപകനും തമ്മിലുള്ള നിയമ പോരാട്ടത്തിന്റെ കഥയാണ് പറയുന്നത്.
