എസ്ബിഐയിൽ അക്കൗണ്ട് ഇല്ലാത്തവർക്കും ഇനി മുതൽ ബാങ്കിന്റെ യോനോ ആപ്പ് ഉപയോഗിച്ച് യുപിഐ ഇടപാടുകൾ നടത്താനാകും. യോനോ ആപ്പ് എല്ലാ ഇന്ത്യൻ പൗരനും ഉപയോഗിക്കാൻ സാധിക്കത്തക്കവിധം മാറുകയാണ്. ഇതിന് മുന്നോടിയായി ആപ് ഉപയോഗിച്ച് ഏത് ബാങ്ക് അക്കൗണ്ട് ഉള്ള വ്യക്തിയ്ക്കും ഇതിലൂടെ യുപിഐ ഇടപാട് നടത്താനാകുമെന്ന് എസ്ബിഐ അറിയിച്ചു.
എസ്ബിഐയുടെ യോനോ ആപ് ഗൂഗിൾ പ്ലേ സ്റ്റോറിലും ആപ്പിളിന്റെ ആപ് സ്റ്റോറിലും ലഭ്യമാണ്. ഇത് ഡൗൺലോഡ് ചെയ്തതിന് ശേഷം ഇതിലെ രജിസ്റ്റർ നൗ ഓപ്ഷൻ മുഖേന മറ്റ് ബാങ്ക് അക്കൗണ്ട് ഉപയോക്താക്കൾക്ക് യോനോയിലൂടെ യുപിഐ സേവനം ലഭ്യമാകും. ഇതിനായി രജിസ്റ്റർ നൗ എന്ന ഓപ്ഷൻ ക്ലിക്ക് ചെയ്തതിന് ശേഷം രജിസ്റ്റർ ടു മേത്ത് യുപിഐ പെയ്മെന്റ് എന്ന ഓപ്ഷനിൽ ക്ലിക്ക് ചെയ്ത് ബാങ്കുമായി ബന്ധിപ്പിച്ച മൊബൈൽ നമ്പർ നൽകണം.
ഇതിന് ശേഷം എസ്എംഎസ് ഉപയോഗിച്ച് മൊബൈൽ നമ്പറിന്റെ വേരിഫിക്കേഷൻ പൂർത്തിയാക്കുക. ഇതിന് ശേഷം ഏത് ബാങ്കിലാണോ അക്കൗണ്ട് ഉള്ളത് ഇത് സെലക്ട് ചെയ്ത് യുപിഐ ഐഡിയുണ്ടാക്കാം. ഇതിന് ശേഷം ആപിലേക്ക് കയറുന്നതിനുള്ള ആറക്ക പിൻ കൂടി നൽകി രജിസ്ട്രേഷൻ പൂർത്തിയാക്കുക.
ഫോൺപേ, ഗൂഗിൾ പേ ആപ്പുകളിൽ ലഭ്യമാകുന്ന ക്യൂആർകോഡ് സ്കാൻ ചെയ്ത് പണം അയക്കൽ, ഒരു അക്കൗണ്ടിൽ നിന്ന് മറ്റൊന്നിലേക്ക് പണമയക്കൽ, ഫോൺ കോൺടാക്ടുകളിലേക്ക് പണമയക്കൽ എന്നീ സേവനങ്ങളെല്ലാം തന്നെ യോനോയിലും ലഭ്യമാകും. യുപിഐ രംഗത്തേക്ക് കടക്കുന്നതോടെ ഫോൺപേ, ഗൂഗിൾ പേ, പേടിഎം എന്നിവയ്ക്ക് വെല്ലുവളി ഉയർത്തുകയാണ് എസ്ബിഐയുടെ ലക്ഷ്യം.
