കർക്കിടകത്തിലെ ആരോഗ്യം ആയുർവേദത്തിലൂടെ.

ആയുസ്സിന്റെ വേദമാണല്ലോ ആയുർവേദം. രോഗശമനത്തിന് മാത്രമല്ല സ്വസ്ഥന്റെ ആരോഗ്യ സംരക്ഷണത്തിലും ഊന്നൽ നൽകുന്ന ശാസ്ത്രമാണ് ആയുർവേദം. രോഗശമനത്തിനും ആരോഗ്യ സംരക്ഷണത്തിനുമായി നിരവധി മാർഗ്ഗങ്ങൾ ആയുർവേദമനുശാസിക്കുന്നുണ്ട്. അതിൽ കേരളത്തിൽ ഏറ്റവും പ്രചാരണത്തിൽ ഉള്ളത് കർക്കിടക ചികിത്സയാണ്.

വേനലിൽ നിന്ന് മഴയിലേക്ക് മാറുന്നതോടെ ശരീരം ബലം കുറയുകയും അതുവഴി നഷ്ടപ്പെടുന്ന പ്രതിരോധശേഷി കർക്കിടകചികിത്സയിലൂടെ വീണ്ടെടുക്കാൻ സാധിക്കും എന്നതാണ് വിശ്വാസം. ജ്യോതിഷശാസ്ത്രമനുസരിച്ച് സൂര്യൻ കർക്കിടക രാശിയിലൂടെ കടന്നുപോകുന്നത് ഈ മാസത്തിലാണ്. ഔഷധികളുടെ നാഥനായ ചന്ദ്രന്റെ രാശി കൂടിയാണ് കർക്കിടകം. അതിനാൽ ഔഷധസസ്യങ്ങൾക്ക് ഈ മാസത്തിൽ വീര്യം വർദ്ധിക്കുന്നു എന്നും വിശ്വാസമുണ്ട്. കർക്കിടകം രാമായണമാസമായി വ്രത ശുദ്ധിയോടെആചരിക്കുന്ന മാസം കൂടിയാണ്. അതിനാൽ ശരീരവും മനസ്സും ഒരേസമയം ശുദ്ധമാകുന്ന പ്രക്രിയ ഈ ഘട്ടത്തിൽ നടക്കുന്നു.

ആയുർവേദത്തിൽ “ഋതുചര്യ” എന്ന ഭാഗം കാലാവസ്ഥാ ഭേദങ്ങൾ മനുഷ്യ ശരീരത്തിലുണ്ടാക്കുന്ന പ്രതികൂലങ്ങളെ ചെറുക്കുവാനും ശരീരത്തെ ആരോഗ്യത്തോടെ നിലനിർത്തുവാനുള്ള മാർഗങ്ങളാണ് നിർദ്ദേശിക്കുന്നത്. ശരീര പരിപാലന പുനരുജ്‌ജീവന ചികിത്സയ്‌ക്ക് അത്യുത്തമമായ കാലഘട്ടമാണ് കർക്കിടകം. പഞ്ചകർമ്മങ്ങളിൽപ്പെടുന്ന വമനം, വിവേചനം, വസ്തി, നസ്യം, രക്തമോക്ഷം എന്നീ ശോധന ചികിത്സകളാണ് കർക്കിടക ചികിത്സയിൽ പ്രധാനം. മാത്രമല്ല ഇലക്കിഴി, ഞവരക്കിഴി, ശിരോധാര, അഭ്യംഗം, തുടങ്ങിയ ചികിത്സകളും അവയോടൊപ്പം പഥ്യാഹാരവും യോഗയും പ്രത്യേകം തയ്യാറാക്കുന്ന മരുന്നുകഞ്ഞി സേവയും ചേരുന്നതാണ് കർക്കിടക ചികിത്സ.

ഔഷധക്കഞ്ഞിയുടെ അതേ പ്രാധാന്യമുള്ളതാണ് പത്തില. അവയും സാധാരണയായി കർക്കിടകത്തിലാണ് കേരളീയർ സേവിക്കുന്നത്. താള്, തകര, തഴുതാമ, ചേമ്പ്, പയറിലെ, ചേനയിലെ, കുമ്പളം, മത്തൻ, ചൊറിയണം, മുള്ളൻചീര, നെയ്യുണ്ണി, കൂവളത്തില, വടത്തകര, കടുകുടുങ്ങ എന്നിവയാണ് പത്തിലകൾ. ദേശത്തിനനുസരിച്ച് പേരിൽ വ്യത്യാസമുണ്ടാകാം.
പത്തിലക്ക് പുറമെ കർക്കിടക മാസത്തിൽ പ്രാധാന്യമുള്ളതാണ് ദശപുഷ്പങ്ങൾ. കറുക , വിഷ്ണുക്രാന്തി, മുക്കൂറ്റി,പൂവാം കുരുന്നില,നിലപ്പന, കയ്യോന്നി, ഉഴിഞ്ഞ, മുയൽച്ചെവിയൻ, ചെറൂള , തിരുതാളി എന്നിവയാണ് ദശപുഷ്പത്തിൽ പെടുന്ന ഔഷധസസ്യങ്ങൾ. കർക്കിടകമാസത്തിൽ ദശപുഷ്പം ചൂടുന്നത് രോഗശമനത്തിനും പാപപരിഹാരത്തിനും നല്ലതാണെന്നാണ് വിശ്വാസം. ദശപുഷ്പങ്ങൾ ഔഷധകഞ്ഞിയിൽ ചേർത്ത് സേവിക്കുകയും ചെയ്യാറുണ്ട്.

പഞ്ചകർമ്മയിലൂടെ ദുഷിച്ചിരിക്കുന്ന വാത- പിത്ത- കഫങ്ങളെ പുറന്തള്ളുകയും ശരീരത്തിൽ സന്തുലിതാവസ്ഥ നിലനിർത്തി ആരോഗ്യപ്രദമായ ചര്യയിലൂടെ രോഗപ്രതിരോധശേഷി കൈവരിക്കുകയും ചെയ്യുക എന്നതാണ് കർക്കിടക ചികിത്സയിലൂടെ ആയുർവേദം നിർദ്ദേശിക്കുന്നത്.
ഡോക്ടർ അക്ഷയ് എം വിജയ്
ഫോൺ: 8891399119
ആയുർവേദ ഡോക്ടർ, യോഗ അധ്യാപകൻ, എഴുത്തുകാരൻ, എന്നീ നിലകളിൽ പ്രവർത്തിക്കുന്ന ലേഖകൻ യോഗാസന സ്പോർട്സ് അസോസിയേഷന്റെ തൃശൂർ ജില്ല ജോയിന്റ് സെക്രട്ടറിയാണ്.