ന്യൂയോർക്ക്: ലോകമെമ്പാടുമുള്ള ജനതയുടെ എക്കാലത്തെയും പ്രിയങ്കരിയാണ് ബാർബി എന്ന പാവ. പ്രായഭേദമന്യേ എല്ലാവർക്കും ബാർബിയെ ഇഷ്ടമാണ്. ഗ്രേറ്റ ഗർവിഗ് സംവിധാനം നിർവഹിക്കുന്ന ബാർബി എന്ന ഹോളിവുഡ് ചിത്രം ഉടൻ തന്നെ പ്രദർശനത്തിനെത്താനിരിക്കുകയാണ്. 100 മില്യൺ ബഡ്ജറ്റിലാണ് ചിത്രം ഒരുക്കിയിരിക്കുന്നത്. ചിത്രത്തിൽ മാർഗോ റോബി, റയാൻ ഗോസ്ലിംഗ് എന്നിവരാണ് കേന്ദ്രകഥാപാത്രങ്ങളെ അവതരിപ്പിക്കുന്നത്. തിളക്കമാർന്ന കണ്ണുകളും പട്ടുപോലെ മിനുസമാർന്ന തലമുടിയിഴകളും അതിമനോഹരമായ ഗൗണുകളുമാണ് ബാർബിയെ ആകർഷിക്കുന്നതിന് പിന്നിലെ പ്രധാന കാരണം. ബാർബി പാവകളെ പോലെ ആകുന്നതിനായി പ്ലാസ്റ്റിക് സർജറികൾക്ക് ഉൾപ്പെടെ വിധേയരായവരും നിരവധിയാണ്.
ഇപ്പോഴിതാ ബാർബിയെ പോലെ ആകാൻ ആഗ്രഹിക്കുന്നവർക്കായുള്ള ഒരു വമ്പൻ ഓഫറാണ് സമൂഹമാദ്ധ്യമങ്ങളിൽ ശ്രദ്ധേയമാകുന്നത്. സ്വപ്ന സാക്ഷാത്കാരത്തിനായി ഓഫർ മുന്നോട്ട് വെച്ചിരിക്കുന്നത് യുഎസിലെ ലോംഗ് ഐലൻഡിലെ സ്കോട്ട് ബ്ലൈയർ എന്ന പ്ലാസ്റ്റിക് സർജനാണ്. 1,20,000 ഡോളർ അതായത് 98,53,950 രൂപയുണ്ടെങ്കിൽ ആരെയും ബാർബിയെ പോലെയാക്കാം എന്നാണ് സ്കോട്ട് നൽകുന്ന വാഗ്ദാനം. ഇതിൽ ഫേഷ്യൽ, ബോഡി സർജറികൾ, തലമുടി, നഖം, പല്ല് എന്നിങ്ങനെ എല്ലാ മാറ്റങ്ങളുമാണ് പാക്കേജിൽ ഉൾപ്പെടുത്തിയിരിക്കുന്നത്.
ഇതിന് പുറമേ ഉപഭോക്താക്കൾക്ക് ഇഷ്ടാനുസരണം തിരഞ്ഞെടുക്കുന്നതിനുള്ള വാഗ്ദാനവും സ്കോട്ട് നൽകുന്നുണ്ട്. ബാർബിക്കഥകളിലെ സുന്ദരാന കെൻ പാവയെ പോലെ ആകുന്നതിനുള്ള പാക്കേജുകളും ഇതിൽ ഉൾപ്പെടുന്നു. ഇതിനായി പുരുഷന്മാർ നൽകേണ്ടത് 110,000 ഡോളർ അതായത് 89,34, 238 രൂപയാണ്. ഇതിന് പുറമേ സർജറിക്കെത്തുന്ന ആൾക്ക് ഇവിടേയ്ക്ക് എത്തുന്നതിനും തിരികെ വീട്ടിലേക്ക് മടങ്ങുന്നതിനും പിങ്ക് നിറത്തിലുള്ള കാർ സർവീസും പാക്കേജിൽ ഉൾപ്പെടുത്തിയിട്ടുണ്ട്. ശസ്ത്രക്രിയയ്ക്ക് ഇത്രയധികം തുക ചെലവാക്കേണ്ടി വരുമായിരുന്നിട്ട് കൂടി നിരവധി ആളുകളാണ് ഇതിനോടകം തന്നെ ആഗ്രഹം പ്രകടിപ്പിച്ച് രംഗത്തെത്തിയിരിക്കുന്നത്.
