പത്തനംതിട്ട: ശബരിമല ദർശനം നടത്തി തെന്നിന്ത്യൻ ചലച്ചിത്ര താരം സിത്താര. കർക്കിടക മാസ പൂജക്കായി നട തുറന്ന വേളയിലായിരുന്നു കുടുംബാംഗങ്ങൾക്കൊപ്പം സിത്താര അയ്യപ്പ ദർശനം നടത്തിയത്. വൈകുന്നേരം ദീപാരാധാന തൊഴുത താരം സന്നിധാനത്ത് വഴിപാടുകളും നടത്തി. പടിപൂജ തൊഴുത് സന്നിധാനത്ത് തങ്ങിയ ശേഷം രാവിലെ കലശാഭിഷേക ചടങ്ങുകളിൽ ഉൾപ്പെടെ പങ്കെടുത്തായിരുന്നു മടങ്ങിയത്.
ശബരിമല അയ്യപ്പ സന്നിധിയിൽ തന്ത്രി കണ്ഠര് ബ്രഹ്മദത്തന്റെ മുഖ്യകാർമ്മികത്വത്തിലാണ് കർക്കിടക മാസ പൂജകൾ നടക്കുന്നത്. പിതാവ് തന്ത്രി കണ്ഠര് രാജീവരും സന്നിധാനത്ത് ഉണ്ട്. മേൽശാന്തി കെ ജയരാമൻ നമ്പൂതിരിയാണ് കളഭ കലശമെഴുന്നള്ളിപ്പ് നടത്തുന്നത്. കർക്കിടകവാവ് ദിനം കൂടിയായിരുന്ന ജൂലൈ 17-ന് സന്നിധാനത്ത് ഭക്തജനങ്ങളുടെ വലിയ തിരക്കായിരുന്നു അനുഭവപ്പെട്ടത്. പമ്പയിൽ പതൃതർപ്പണം നടത്തിയ ശേഷമായിരുന്നു നിരവധി ഭക്തർ മല കയറിയത്.
