ഉണ്ണി മുകുന്ദനും അപർണ ബാലമുരളിയും പ്രധാന കഥാപാത്രങ്ങളെ അവതരിപ്പിക്കുന്ന പുതിയ ചിത്രം ‘മിണ്ടിയും പറഞ്ഞും’ ഇന്ത്യൻ ഫിലിം ഫെസ്റ്റിവൽ ഓഫ് ആൽബെർട്ട 2023-ലേക്ക് തിരഞ്ഞെടുക്കപ്പെട്ടു. ഉണ്ണി മുകുന്ദൻ ഇക്കാര്യം സമൂഹ മാദ്ധ്യമങ്ങളിൽ പങ്കുവെച്ചിട്ടുണ്ട്.
ടോവിനോ തോമസ് ചിത്രം ‘ലൂക്ക’ ഒരുക്കിയ അരുൺ ബോസ് ആണ് മിണ്ടിയും പറഞ്ഞും സംവിധാനം ചെയ്യുന്നത്. മൃദുൽ ജോർജുമായി ചേർന്നാണ് ചിത്രത്തിന്റെ തിരക്കഥ അരുൺ ബോസ് എഴുതിയിരിക്കുന്നത്. മെച്യുർ റൊമാൻസ് ജോണറിൽ ഒരുങ്ങുന്ന ചിത്രം ഉടൻ തിയേറ്ററുകളിൽ എത്തും.
ചിത്രത്തിൽ സനൽ എന്ന കഥാപാത്രമായിട്ടാണ് ഉണ്ണി മുകുന്ദൻ അഭിനയിക്കുന്നത്. ലീനയായി അപർണ ബാലമുരളിയും എത്തുന്നു. ജാഫർ ഇടുക്കി, ജൂഡ് ആന്റണി ജോസഫ്, മാല പാർവതി, സഞ്ജു മധു, സോഹൻ സീനുലാൽ, ഗീതി സംഗീത, പ്രശാന്ത് മുരളി, ആതിര സുരേഷ് തുടങ്ങിയവരാണ് ചിത്രത്തിലെ മറ്റ് താരങ്ങൾ. മധു അമ്പാട്ട് ആണ് ഛായാഗ്രാഹണം നിർവഹിക്കുന്നത്. സൂരജ് എസ് കുറുപ്പ് ആണ് സംഗീത സംവിധാനം നിർവഹിച്ചിരിക്കുന്നത്.
