ഇന്ത്യൻ ഫിലിം ഫെസ്റ്റിവൽ ഓഫ് മെൽബണിൽ പ്രശസ്ത ബോളിവുഡ് ചലച്ചിത്ര നിർമ്മാതാവും സംവിധായകനുമായ കരൺ ജോഹറിനെ ആദരിക്കും. ഇന്ത്യൻ ചലച്ചിത്ര നിർമ്മാണ വ്യവസായത്തിൽ 25 വർഷം പൂർത്തിയാക്കുന്നതിനാലാണ് അദ്ദേഹത്തെ ആദരിക്കുന്നതെന്ന് ഇന്ത്യൻ ഫിലിം ഫെസ്റ്റിവൽ ഓഫ് മെൽബൺ അറിയിച്ചു. മേളയിൽ ഇന്ത്യൻ സിനിമയ്‌ക്ക് കരൺ നൽകിയ സംഭാവനകൾ പ്രദർശിപ്പിക്കും. പ്രത്യേക പരിപാടികളും പ്രത്യേക പ്രദർശനങ്ങളും സംഘടിപ്പിക്കും. ഓഗസ്റ്റ് 11 മുതൽ 20 വരെയാണ് ചലച്ചിത്ര മേള നടക്കുക.
1998-ൽ കുച്ച് കുച്ച് ഹോതാ ഹേ എന്ന ചിത്രത്തിലൂടെയാണ് ചലച്ചിത്ര നിർമ്മാതാവായി കരൺ ജോഹർ തന്റെ അരങ്ങേറ്റം കുറിച്ചത്. അത് ഇന്ത്യൻ സിനിമയിലെ ബ്ലോക്ക്ബസ്റ്ററും ക്ലാസിക്കുമായി മാറി. പിന്നീട് അദ്ദേഹം കഭി ഖുഷി കഭി ഗം…, കഭി അൽവിദ നാ കെഹ്ന, മൈ നെയിം ഈസ് ഖാൻ, സ്റ്റുഡന്റ് ഓഫ് ദ ഇയർ തുടങ്ങിയ സിനിമകൾ സംവിധാനം ചെയ്തു.
മെൽബണിലെ 14-ാമത് ഇന്ത്യൻ ഫിലിം ഫെസ്റ്റിവലിന്റെ ഭാഗമാകാൻ കഴിഞ്ഞതിൽ അഭിമാനിക്കുന്നുവെന്ന് കരൺ ജോഹർ പറഞ്ഞു. ഒരു ചലച്ചിത്ര നിർമ്മാതാവ് എന്ന നിലയിൽ 25 വർഷം പൂർത്തിയാക്കുന്ന ഈ വർഷം എന്റെ കരിയറിലെ ഈ നാഴികക്കല്ലിനെ അനുസ്മരിക്കാൻ ഈ മേളയേക്കാൾ മികച്ച വേദിയെക്കുറിച്ച് എനിക്ക് ചിന്തിക്കാൻ കഴിയില്ലെന്നും അദ്ദേഹം കൂട്ടിച്ചേർത്തു.
ഫെസ്റ്റിവലിൽ മൂന്നാം തവണയും മടങ്ങിയെത്തുമ്പോൾ, ഓസ്‌ട്രേലിയൻ പ്രേക്ഷകരിൽ നിന്ന് എനിക്ക് ലഭിച്ച സ്‌നേഹവും പിന്തുണയും എന്നെ അതിശയിപ്പിക്കുന്നു. ഒരു ചലച്ചിത്രകാരൻ എന്ന നിലയിൽ കഴിഞ്ഞ 25 വർഷത്തെ എന്റെ കലാപരമായ കാഴ്ചപ്പാട് രൂപപ്പെടുത്തിയ വെല്ലുവിളികൾ, വിജയങ്ങൾ, പഠനങ്ങൾ എന്നിവയെക്കുറിച്ച് ചിന്തിക്കാനുള്ള അവസരമാണിതെന്നും കരൺ വ്യക്തമാക്കി.
