വിശ്വാമിത്രൻ രാമ ലക്ഷ്മണന്മാർക്ക് പലവിധ മന്ത്രങ്ങളും വിദ്യകളും ഉപദേശിച്ചു കൊടുത്തു. വിശപ്പും ദാഹവും വരുമ്പോൾ ബല – അതിബല മന്ത്രങ്ങൾ ജപിച്ചാൽ ശക്തി ലഭിക്കും. സഹനശക്തിയാണ് ആദ്യം അഭ്യസിക്കേണ്ടത് എന്ന് മഹർഷി നന്നായി മനസ്സിലാക്കി കൊടുത്തു.
കൊട്ടാരത്തിൽ കഴിഞ്ഞ കുട്ടികളാണ് നിങ്ങൾ. വിശപ്പും ദാഹവും നിങ്ങൾ അറിഞ്ഞിട്ടില്ല. ഇനിയും എത്രനാൾ കാട്ടിൽ വസിക്കാനുള്ളതാണ് യാത്രകൾ യുദ്ധങ്ങൾ ഇങ്ങനെ എന്തെല്ലാം വഴികൾ മുന്നിലുണ്ട്. ജീവിതയാത്രയിൽ ഇവയൊക്കെ നേരിടാൻ ഇന്നേ വിദ്യകൾ അഭ്യസിക്കുക.
ബാല്യം ഏറ്റവും സുഖകരമായ കാലമാണ്. എന്നാൽ കൗമാരപ്രായവും യൗവന പ്രായവും ഇനി മുന്നിലുണ്ട്. കൗമാരപ്രായം വളരെ അപകടം പിടിച്ചതാണ്. പല നാടകങ്ങളും കാണേണ്ടിവരും. പറ്റിക്കാൻ തന്നെ നടക്കുന്ന ചില കലാകാരന്മാരും ഉണ്ട്. മായാപ്രയോഗത്തിലൂടെ മനുഷ്യനായും മൃഗമായും മീനായും മാനായും എല്ലാം നമ്മുടെ മുന്നിൽ ആ രാക്ഷസന്മാർ വേഷമാടും.
മാരന്റെ, കാമദേവന്റെ കുൽസിത ശ്രമങ്ങൾക്ക് പാത്രമാകാവുന്ന കാലമാണ് കൗമാരം. അനുകരണങ്ങളിലൂടെ മാരീചനും, കൈക്കരുത്തുകാട്ടി സുബാഹുവും, മായാവിദ്യകൾ കൊണ്ട് രാവണനും വഴിതെറ്റിക്കും. ഇത് ഒഴിവാക്കാൻ മന്ത്ര ജപങ്ങളിലൂടെയും മറ്റും കുറെയൊക്കെ സാധ്യമാകും.. കേൾക്കലും കേൾപ്പിക്കലും ആവശ്യം. ഇന്ദ്രിയങ്ങളും ഇന്ദ്രിയ രാജാവായ ഇന്ദ്രനും അതിന് തയ്യാറായി നിൽക്കുന്നു.”കാടിതുകണ്ടായോ നീ കാമരൂപിണിയായ താടകാഭയങ്കരി വാണിടും ദേശമല്ലോ.. അവളെ പേടിച്ചാലും നേർവഴി നടത്തിപ്പീലാ”എന്ന് പറയുന്നത് വെറും കാടിനെക്കുറിച്ചല്ല.
കൗമാരത്തെ ജയിച്ച് മുന്നിലേക്ക് നോക്കുമ്പോൾ കാണുന്നത് കാമരൂപിണിയുടെ കാടാണ്. “യൗവനം” എന്നതിലെ വനമാണ് “കാടിതുകണ്ടായോ നീ” എന്നതിലൂടെ ഉദ്ദേശിക്കുന്നത്. ഒരുപക്ഷെ മാനവ ജന്മം വാനപ്രസ്ഥത്തിൽ കടന്നു പോകേണ്ട ഘോര വനാന്തരത്തെക്കാൾ ഭീകരമാണ് കാമരൂപിണിയായ താടകാഭയങ്കരി വാണിടും “യൗവനം”എന്ന മഹാവനം. ആ വനത്തിൽ കാമം ക്രോധം ലോകം മോഹം മതം മാത്സര്യം എന്നിങ്ങനെയുള്ള ശത്രുക്കൾ മുൻപിൽ ഉണ്ട്. അവയെ നേരിടാൻ പഠിക്കണം. ഇവിടെ ഒളിച്ചോടിയിട്ട് കാര്യമില്ല. ധൈര്യത്തോടെ നേരിട്ട് പഠിക്കണം.
ഇതാണ് താടകാ നിഗ്രഹം നമുക്ക് തരുന്ന പാഠം
എഴുതിയത്
എ പി ജയശങ്കർ
ഫോൺ : 9447213643
ശ്രീ എ പി ജയശങ്കർ എഴുതിയ രാമായണ തത്വ വിചാരത്തിന്റെ മറ്റു ഭാഗങ്ങൾ വായിക്കാൻ ഈ ലിങ്കിൽ ക്ലിക്ക് ചെയ്യുക
https://janamtv.com/tag/ramayana-thatwavicharam/
Comments