റഹ്മാൻ നായക വേഷത്തിൽ എത്തുന്ന ‘സമാറയുടെ’ ട്രെയിലർ പുറത്ത്. സുരേഷ് ഗോപിയും ഗോകുൽ സുരേഷും ഇവരുടെ സമൂഹമാദ്ധ്യമങ്ങളിലെ അക്കൗണ്ടിലൂടെയാണ് ട്രെയിലർ റിലീസ് ചെയ്തത്. ഓഗസ്റ്റ് നാലിനാണ് ചിത്രം തിയേറ്ററുകളിലെത്തുക. മാജിക് ഫ്രെയിംസാണ് സമാറ തീയേറ്ററിലെത്തിക്കുന്നത്. നവാഗതനായ സംവിധായകൻ ചാൾസ് ജോസഫ് രചനയും സംവിധാനവും നിർവഹിച്ച ചിത്രമാണ് സമാറ. പീകോക് ആർട്ട് ഹൗസിന്റെ ബാനറിൽ എംകെ സുഭാകരൻ, അനുജ് വർഗീസ് വില്ല്യാടത്ത് എന്നിവർ ചേർന്നാണ് ചിത്രം നിർമ്മിക്കുന്നത്.
സയൻസ് ഫിക്ഷൻ ത്രില്ലർ ഗണത്തിൽ പെടുന്ന ചിത്രമാണ് സമാറ. ട്രെയിലർ റിലീസ് ചെയ്യുന്നതിന് മുന്നോടിയായി ചിത്രത്തിലെ അണിയറപ്രവർത്തകരും താരങ്ങളും ചേർന്ന് ഒരു ക്യാമ്പയിൻ സംഘടിപ്പിച്ചിരുന്നു. ചിത്രത്തിന്റെതായി ഇതുവരെ പുറത്തു വന്നിട്ടുള്ള വാർത്തകളിൽ നിന്നൊക്കെയും വ്യത്യസ്തമായിരിക്കും ട്രെയിലർ എന്ന തരത്തിലുള്ള സൂചനയായിരുന്നു ക്യാമ്പയിനിൽ നൽകിയിരിക്കുന്നത്. ഇത്തരത്തിൽ വ്യത്യസ്തമായ ഒരു ട്രെയിലർ തന്നെയാണ് പുറത്തു വിട്ടിരിക്കുന്നത്.
പ്രശസ്ത ബോളിവുഡ് താരം മീർസർവാർ, തമിഴ് നടൻ ഭരത്, സഞ്ജന ദീപു, രാഹുൽ മാധവ്, ബിനോജ് വില്ല്യ, ഗോവിന്ദ് കൃഷ്ണ, ടിനിജ്, ടോം സ്കോട്ട് എന്നിവർക്കൊപ്പം 18-ഓളം പുതുമുഖ താരങ്ങളും 35-ഓളം വിദേശ താരങ്ങളും ചിത്രത്തിൽ അണിനിരക്കുന്നുണ്ട്. കുളു-മണാലി, ധർമ്മശാല, ജമ്മു കശ്മീർ എന്നിവിടങ്ങളിലാണ് സിനിമയുടെ ഭൂരിഭാഗം ഭാഗങ്ങളും ചിത്രീകരിച്ചിരിക്കുന്നത്.
