മോഹൻലാൽ മഹാ നടനാണെന്നും ലാലിന്റെ പ്രകടനം തന്നെ അത്ഭുതപ്പെടുത്തിയെന്നും രജനികാന്ത്. കഴിഞ്ഞ ദിവസം ചെന്നൈയിൽ നടന്ന ‘ജയിലർ’ സിനിമയുടെ ഓഡിയോ ലോഞ്ചിലാണ് താരം മോഹൻലാലിനെ കുറിച്ച് സംസാരിച്ചത്. ചടങ്ങിൽ മോഹൻലാൽ സന്നിഹിതനായിരുന്നില്ല. എന്തൊരു മനുഷ്യനാണ് മോഹൻലാൽ, മഹാ നടനാണ് അദ്ദേഹം, എന്നെ ശരിക്കും അത്ഭുതപ്പെടുത്തി. എന്നായിരുന്നു രജനിയുടെ വാക്കുകൾ.
തന്നെ നേരിട്ട് വിളിച്ചാണ് ചിത്രത്തിൽ അഭിനയിക്കുന്ന കാര്യം മോഹൻലാൽ പറഞ്ഞതെന്ന് സംവിധായകൻ നെൽസൺ ദിലീപ്കുമാറും പറഞ്ഞു. കഥ എങ്ങനെ എന്നതല്ല, രജനി സാറിനോടുള്ള ഇഷ്ടമാണ് അദ്ദേഹത്തെ ഈ സിനിമ ചെയ്യാൻ പ്രേരിപ്പിച്ചത്. അതിനാൽ ഇത്തരം ഒരു അവസരം ഒരിക്കലും ദുരുപയോഗം ചെയ്യരുതെന്ന് താൻ ഉറപ്പിച്ചിരുന്നു. ലാൽ സാറിന് വേണ്ടതെല്ലാം ചിത്രത്തിലുണ്ടെന്ന് ഉറപ്പുവരുത്തിയിട്ടുണ്ട് എന്നാണ് എന്റെ വിശ്വാസം,’ നെൽസണും പറഞ്ഞു.
സൺ പിക്ചേഴ്സിന്റെ ബാനറിൽ കലാനിധി മാരൻ നിർമ്മിക്കുന്ന ചിത്രം ഓഗസ്റ്റ് 10 നാണ് പുറത്തിറങ്ങുന്നത്. ഇതിന് മുന്നോടിയായി കഴിഞ്ഞ ദിവസമായിരുന്നു ഓഡിയോ ലോഞ്ച് സംഘടിപ്പിച്ചത്. ആരവങ്ങളോടെയും കരഘോഷങ്ങളോടെയുമായിരുന്നു രജനികാന്തിനെ സദസ് വരവേറ്റത്. നടൻ വേദിയിലേക്ക് വരുന്നതിന്റെ വീഡിയോ സോഷ്യൽ മീഡിയയിൽ വൈറലായിരിക്കുകയാണ്. രജനി ആരാധകർ വലിയ പ്രതീക്ഷയർപ്പിച്ചിരിക്കുന്ന ചിത്രമാണ് ജയിലർ.
Comments