ജമ്മു കശ്മീർ: കുൽഗാമിൽ ഇന്ത്യൻ ആർമി ഉദ്യോഗസ്ഥനായ ജാവേദ് അഹമ്മദ് വാനിയെ(25) തട്ടിക്കൊണ്ട് പോയി. ശനിയാഴ്ച രാത്രി 8 മണിയോടെയാണ് സൈനികനെ കാണാതായത്. അവധിക്ക് നാട്ടിലെത്തിയ സൈനികനെ വാഹനത്തിൽ നിന്നാണ് തട്ടിക്കൊണ്ടുപോയതെന്നാണ് കുടുംബത്തിന്റെ പരാതി. ലഡാക്കിലെ ലേയിലാണ് ജാവേദ് അഹമ്മദ് വാനി ജോലിചെയ്തിരുന്നത്.
ചൗവൽഗാമിലേക്ക് സാധനങ്ങൾ വാങ്ങാനായി പോയതിന് പിന്നാലെയാണ് സൈനികനെ കാണാതായത്. ജാവേദ് അഹമ്മദ് തിരികെ വീട്ടിലെത്താതായതോടെ കുടുംബം തിരച്ചിൽ നടത്തുകയായിരുന്നു. തുടർന്ന് നടത്തിയ പരിശോധനയിൽ പരൻഹാലിൽ നിന്നും ജാവേദ് സഞ്ചരിച്ചിരുന്ന കാർ കണ്ടെത്തി. പൂട്ട് തുറന്ന അവസ്ഥയിലാണ് കാർ കിടന്നിരുന്നത്. വാഹനത്തിനുള്ളിൽ ഒരു ജോഡി ചെരുപ്പും രക്തക്കറയും ഉണ്ടായിരുന്നുവെന്നാണ് കുടുംബം പറയുന്നത്. തട്ടിക്കൊണ്ടുപോയ സൈനികനെ കണ്ടെത്താൻ ഇന്ത്യൻ സൈന്യവും പോലീസും തിരച്ചിൽ തുടരുകയാണ്.
